«Մենք կոնֆլիկտի մեջ ենք արտաքին գործերի նախարարության հետ, քանի որ թե Եվրոպայում, թե այլուր մեր Հայաստանի Հանրապետության վարած քաղաքականությունը հաճախ լրացնում են եվրոպահայ, սփյուռքահայ կազմակերպությունները»,- այսօր լրագրողների հետ հանդիպմանը հայտարարեց Եվրոպայի հայկական միությունների ֆորումի նախագահ Աշոտ Գրիգորյանը: Նա մտահոգ է հատկապես Ցեղասպանության ճանաչման հարցում մեր պետության վարած քաղաքականության պատճառով, նկատում է, որ թուրքերը վախով էին սպասում Ցեղասպանության 100-ամյա տարելիցին, մտածում էին, որ այդ օրերին հայաստանյան իշխանությունները ձեռք-ձեռքի տված կաշխատեն:
«Բայց քանի որ խզված է կապը արտգործնախարարության եւ հայկական իշխանությունների հետ, ծրագրերը ոնց որ թե չեն կատարվում»,- ասում է պարոն Գրիգորյանը:
Նա հայտարարեց, որ Եվրոպայի հայկական միությունների ֆորումը Ցեղասպանության 100-ամյա տարելիցին ընդառաջ որոշ միջոցառումներ նախատեսել է, մասնավորապես՝ եվրոպական քաղաքներում համերգների կազմակերպում, որոնց թեման լինելու է ցեղասպանությունը, պայմանավորվածություն կա հայ անվանի երիտասարդ երաժիշտ, ջութակահար Սերգեյ Խաչատրյանի հետ, ով համաձայնվել է մասնակցել համերգներին, նաեւ պայմանավորվածություն կա, որ 2015 թվականի ապրիլի 24-ին Փարիզի Աստվածամոր տաճարում պատարագ հնչեցվի Եղեռնի տարելիցի կապակցությամբ:
«Մենք կոչով դիմելու ենք մեր բոլոր Հայաստանի մարզիկներին եւ հավաքականներին, որ 2014 թվականի ապրիլի 24-ից սկսած նրանք բոլոր մարզական միջոցառումներին մասնակցեն սեւ թեւկապներով, մենք կպատրաստենք այդպիսի թեւկապներ, որոնց վրա գրված կլինեն 1915-2015»:
Կարդացեք նաև
Պարոն Գրիգորյանը նշեց, որ այլ ավելի լուրջ ծրագրեր էլ կան նախատեսված, սակայն դրանք ցանկանում է գաղտնի պահել:
Ցեղասպանության ճանաչման նախաշեմին, ըստ նրա, պետք է որոշակի քայլեր ձեռնարկել, նախեւառաջ Թուրքիայի հասարակական սեկտորի հետ աշխատել. «Թուրքիայի հասարակությունն այսօր պատրաստ է, որ իրենց կառավարությունից պահանջի Հայոց ցեղասպանության ընդունումը»,- ասում է պարոն Գրիգորյանը:
Երկրորդ կարեւոր քայլը, ըստ նրա, ՄԱԿ-ի կողմից բանաձեւ ընդունելուն ուղղված քայլեր ձեռնարկելն է, այնուհետեւ պետք է ահաբեկել Թուրքիային, որ հայցն ամբողջովին նախապատրաստված է, եւ մեզ համագործակից եվրոպահայ կամ այլ միջազգային իրավաբանական ինստիտուտների իրավաբանների հետ ներկայացնել այն Հաագայի միջազգային դատարան:
Խոսելով Հայաստանի ներքաղաքական կյանքում տեղի ունեցող փոփոխությունների, մասնավորապես վարչապետի պաշտոնանկության մասին՝ Աշոտ Գրիգորյանը հիշեցրեց, որ իրենց կազմակերպությունը ժամանակին դիմել է նախագահին եւ ԱԺ նախագահին՝ վարչապետի անօրինականությունները ներկայացնելու դիմումով: Հիմա արդեն հույս ունի, որ նոր վարչապետի հետ համագործակցել կլինի. «Մենք կարծում ենք, որ հին վարչապետը պիտի պատասխան տա իր արածների համար»:
Մանրամասները` շուտով տեսանյութում
Մեր հարցին, թե ում կցանկանա տեսնել վարչապետի պաշտոնում, որի հետ համագործակցել կստացվի, Աշոտ Գրիգորյանը պատասխանեց. «Ես կարծում եմ, որ այսօր ցանկացած թեկնածու, որը կնշանակվի ի շահ նախագահի, դա կլինի դժբախտություն, իսկ այն, որ ընտրվի այնպիսի վարչապետ, որը Հայաստանի տնտեսությունը երկու տարով ուղղակի կարող է հեքիաթային դարձնել, այդպիսի վարչապետ ման եկեք Եվրոպայում, Ամերիկայում, այստեղ չկա»:
Հռիփսիմե ՀՈՎՀԱՆՆԻՍՅԱՆ
