«Վահանը կատարել էր տարրական մի փորձ՝ ուղղակի համեմատեց գազի որակը Հայաստանում եւ հարեւան երկրում՝ Վրաստանում, ինչը արդեն ժողովուրդն էր զգացել, բոլորն էին զգացել»,- այսօր՝ ապրիլի 9-ին՝ լրագրողների հետ հանդիպման ընթացքում, հայտարարեց երգահան Էդուարդ Զորիկյանը:
Նրա համար անհասկանալի էր, թե ինչո՞ւ է հանրապետության նախագահը գնում էներգետիկայի նախարարություն եւ պատվիրում է նրա աշխատակիցներին բացատրել ժողովրդին, թե ինչո՞ւ է գազը սահման հասնում մի գնով, իսկ հայ սպառողներին՝ երկու անգամ թանկ.
«Ամբողջ հսկայական Ռուսաստանով այդ գազը գալիս հասնում է Հայաստանի սահման, Հայաստանը, որ կետ է երկրի վրա, գլոբուսի վրա, երկու անգամ թանկանում նոր հասնում է սպառողին»:
Ազատամարտիկ Կարեն Մելիքբեկյանը հայտարարեց, որ ՀՀ-ն տնտեսական կախման մեջ լինելով տարբեր պետություններից՝ վտանգի տակ է դնում իր անկախությունը: Նա նշեց, որ ամբողջ ձմեռվա ընթացքում գազ չի օգտագործել, քանի որ «Գազպրոմին» համարում է գրպանահատ.
Կարդացեք նաև
«Ինքը մտել է ամեն մի ընտանիք, ամեն մի անձի գրպան, եւ այսօր ամբողջ այդ գումարներն ինքը գողացել է ժողովրդից: Ինքը պետք է այս ժողովրդի թալանի համար պատասխան տա ամբողջ ժողովրդի առաջ: Կառավարությունն այսօր հրաժարական է տվել, նրանցից ովքեր, որ առնչվում են այս թալանի հետ, պատասխանատու են»:
Հիշեցնենք՝ «Ներազգային ազատագրական շարժում» քաղաքացիական նախաձեռնության անդամ ազատամարտիկներն ու արվեստագետները վաղը՝ ապրիլի 10-ին, բողոքի ակցիա են կազմակերպելու, որի ընթացքում, պահանջելու են գազի գնի վերանայում եւ գանձված գումարների փոխհատուցում:
Ամի ՉԻՉԱԿՅԱՆ
