Այս պահին «Դեմ եմ» քաղաքացիական նախաձեռնության անդամները հավաքվել են ֆինանսների նախարարության շենքի դիմաց եւ ֆինանսների նախարարի ժամանակավոր պաշտոնակատարից պահանջում են ներքեւ իջնել ու պատասխանել իրենց հարցերին:
Այս պահին ակտիվիստները սուլում են եւ գոռում՝ «Դեմ ենք»: Ակտիվիստներից Հայկ Ավետիսյանը հայտարարում է, որ պետք է մինչեւ վերջ պայքարել թե պետական եւ թե մասնավոր հիմնարկներում աշխատող իրենց ընկերների իրավունքների պաշտպանության համար եւ հորդորեց պետական հիմնարկներում ճնշումների ենթարկվող աշխատակիցներին՝ դիմել գործատուներին եւ պահանջել հրաժարվել պարտադիր պահումներից: Դավիթ Մանուկյանն էլ նկատեց, որ մինչեւ հիմա կառավարության անդամները եւ այլ պաշտոնյաներ անհիմն էին համարում իրենց անվստահությունը կենսաթոշակային օրենքի ներդրման վերաբերյալ, բայց Սահմանադրական դատարանի որոշումից հետո իշխանության այս պահվածքը հաստատում է, որ իրենց անվստահությունը խիստ հիմնավորված էր, որովհետեւ իմանալով ,որ սեպտեմբերի 30-ից օրենքը չի գործելու, դրամահավաքը շարունակում են: Արդեն 20 րոպե է՝ ինչ ակտիվիստները նախարարության առջեւ են, բայց տեսնելով, որ ոչ ոք ներքեւ չի իջնում, ակտիվիստները առաջարկում են իրենք մտնեն նախարարություն: Դավիթ Մանուկյանի խոսքով, ՍԴ իրենց տվել է զենք եւ իրենք այդ զենքը պետք է օգտագործեն մինչեւ վերջ: Այս պահին ակտիվիստները գոչում են՝ «Ոչ թալանին» եւ սուլում են:
Արփինե ՍԻՄՈՆՅԱՆ
