Թափառող կենդանիների խնդիրը աշխարհի բոլոր երկրներում էլ կա: Թափառող կենդանիների հարցում իրենց դերն ունեն նաեւ Երեւանին մերձակա բնակավայրերը, եւ որքան էլ մայրաքաղաքում նրանց հարցը լուծվի, այդ կենդանիները ներթափանցում են մայրաքաղաք: Այսօր քաղաքապետարանում տեղի ունեցած ասուլիսում ասաց Երեւանի փոխքաղաքապետ Կամո Արեյանը` պատասխանելով հարցին, թե բյուջեից թափառող կենդանիների համար ավելի շատ գումար է հատկացվում, քան` վերելակների սպասարկման: Պարոն Արեյանի մեկնաբանությունները` տեսանյութում
Պարոն Արեյանի ներկայացմամբ, այս տարի մայրաքաղաքում կանցկացվի 6,5 կիլոմետր կոյուղատար համակարգ, ինչը 9 համայնքների որոշ թաղամասերում ի սկզբանե էլ բացակայել է: Այս տարվա բյուջեով ջեռուցման ցանցով կապահովվեն մարզադպրոցներ եւ պոլիկլինիկաներ: 300 միլիոն դրամ էլ Երեւանի Կենդանաբանական այգու բարեկարգման համար կհատկացվի: Կամո Արեյանի տվյալներով, 90 միլիոն դրամ կտրամադրվի կամուրջների պահպանման համար, իսկ մեկ կամուրջ, որը Հրաչյա Քոչար փողոցը կապում է Ռիգայի փողոցին` ամբողջությամբ կհիմնանորոգվի: Վերգետնյա 18 անցում արդեն կառուցվել է, 7-ն այս տարվա ծրագրով է նախատեսված:
Հաշմանդամ մարդկանց համար մայրաքաղաքի փողոցներում թեքահարթակների հարցը, ինչպես ասաց պարոն Արեյանը, դեռևս լիարժեք լուծված չէ: Անցյալ տարի կառուցվել է 382 թեքահարթակ, այս տարի, քաղաքային իշխանությունները 200-ն էլ պատրաստվում են կառուցել, ինչի համար կպահանջվի 40 միլիոն դրամ: Փոխքաղաքապետի ներկայացմամբ, վայրերն ընտրվել են հաշմանդամ մարդկանց առաջարկով եւ կառուցման ժամանակ էլ նրանցից բաղկացած հանձնաժողովը կհետեւի աշխատանքներին: Այս տարի շահագործման կհանձնվի երկու ճանապարհ: Մեկը` Իսակով-Լենինգրադյան մայրուղին, որի աշխատանքները մասամբ ավարտվել են եւ Ասիական բանկի ֆինանսավորմամբ կառուցվող Արգավանդի խաչմերուկից մինչեւ Նորագավիթ տանող ճանապարհը:
Կարդացեք նաև
170 միլիոն դրամ էլ կհատկացվի, Կամո Արեյանի ներկայացմամբ, քայքայված 18 հենապատերի վերանորոգման համար: Այս տարի քաղաքապետարանը նախատեսել է 4-րդ աստիճանի վթարային շենքերից վերաբնակեցնել 470 ընտանիքների, որի համար կծախսվի 2,7 միլիարդ դրամ: Մայրաքաղաքի շենքերի 210 վթարային պատշգամբ էլ կենթարկվի հիմնանորոգման: Բյուջեի միջոցներով, մոտ 1,8 միլիարդ դրամի կկատարվեն բակերի բարեկարգում, խաղահրապարակների կառուցման աշխատանքներ:
Լուսինե ԲՈՒԴԱՂՅԱՆ
