«Արտաքին գործոնը Հայաստանում մեծ ազդեցություն ունենալ չի կարող: Դուրսը կարող է ինչ-որ ցանկություններ ունենալ, բայց ճնշում, որ ինչ-որ մեկին հանեն կամ նշանակեն` նման բան չկա»,- այսօր «Հայացք» մամուլի ակումբում կարծիք հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Ըստ նրա, Տիգրան Սարգսյանի հրաժարականի հարցը վաղուց էր բարձրացված, դա քննարկվել է եւ մեկ տարի առաջ, եւ վեց ամիս առաջ, ի վերջո, նախագահը հայտարարել էր, որ եթե այս կառավարությունը չապահովի նախագահի նշած տնտեսական աճը`այդ հարցին անդրադառնալու էին, մանավանդ, որ Հայաստանի բոլոր արեւմտամետները մեկ օրում դարձան ՄՄ-ի ջատագովներ. «Նման մարդիկ շատ ավելի լավ են կատարում; Եթե թողնեին այս մարդկանց, նրանք ոչ թե ՄՄ կմտնեին`չորեքթաթ, սողալով, չգիտեմ ինչ կանեին: Ո՞ւմ բերեն, երբ մարդը պատրաստ է կամովին ամեն ինչ անել: Բերեն մեկին, ով դեռ պարզ չէ, կարող է պայմաններ առաջարկի: Սրանք առանց պայմանները հարցնելու`բոբիկացած վազում էին»:
Արձագանքելով լրագրողների դիտարկումներին, Գառնի Իսագուլյանը նկատեց, որ Հայաստանում նախագահացուներ էլ շատ ունենք`«Հայաստանը խելոք մարդկանցով լիքն է»:
Ընդհանուր առմամբ, նա չի կարծում, որ այս պարագայում նախագահը խնդիր դնի`Սահմանադրական այնպիսի փոփոխությունների, որ հետո վարչապետի պաշտոնը ստանձնի եւ հավերժ կառավարի Հայաստանը: Իր գնահատմամբ, Սերժ Սարգսյանն այժմ խնդիր ունի դրական իմիջով հեռանալու եւ պատմության մեջ մնալու:
Կարդացեք նաև
Aravot.am-ի հարցին`հավանական համարո՞ւմ է, որ ԲՀԿ-ն եւ ՀՅԴ-ն համալրեն կոալիցիայի շարքերը, մանավանդ, որ վերջիններս ակնարկում են, որ Սերժ Սարգսյանի հրաժարականի հարցն իրենց օրակարգում չկա, Գառնիկ Իսագուլյանն ասաց, որ ԲՀԿ-ն միշտ էլ հայտարարել է, որ նախագահի հարց իր օրակարգում չկա:
Կմտնի՞ ԲՀԿ–ն կոալիցիա, թե`ոչ, Գառնիկ Իսագուլյանի դիտարկումները`տեսանյութում:
Նելլի ԳՐԻԳՈՐՅԱՆ
