Մայրության ու գեղեցկության տոնի կապակցությամբ Գյումրու ծննդատուն այցելած քաղաքապետ Սամվել Բալասանյանը լրագրողների հետ զրույցում ասաց, որ ամենամեծ հարստությունը ծնողի, ընտանիքի համար երեխան է ու որպես օրինակ մեջբերեց իր անուն-ազգանուն-հայրանունը կրող թոռնիկին`Սամվել Միսակի Բալասանյանին: «Ես փոքրիկ Սամվել Բալասանյան ունեմ արդեն, 6 ամսական է թոռնիկս, մենք անչափ ուրախանում ենք նրանով, դրանից մեծ ուրախություն ընտանիքում չկա: Մենք պետք է կարողանանք էնպիսի օրենքներ ընդունել, որպեսզի խրախուսենք ծնելիությունը: Օրինակ` ես օրենքի նախագիծ ունեի բազմազավակ ընտանիքիների հետ կապված: Ճիշտն ասած, հիմա ոնց, որ թե ուզում են ընդունել էդ օրենքի նախագիծը, շրջանառության մեջ է: Շատ կարևոր է, պետք է կարողանանք խրախուսել բազմազավակությունը: Ես իմ կյանքի փորձով եմ ասում, ինչքան շատ երեխա մարդ ունենա, այնքան հարուստ կլինի, նա երեխայով է հարուստ, սերնդով է հարուստ»:
Ըստ Սամվել Բալասանյանի, յուրաքանչյուր հայ ընտանիք առնվազն 4 երեխա պիտի ունենա: «Օրինակ` ես 3 երեխա ունեմ, բայց գտնում եմ, որ քիչ է, բայց պրոպագանդում եմ, որ իմ որդիները շատ զավակներ ունենան` 5-6, կապ չունի սեռը, կարևորը որ երեխա լինի», -ասաց քաղաքապետը:
Նշենք, որ Գյումրու ծննդատանը այսօր 13 երեխա են ծնվել:
Նունե ԱՐԵՎՇԱՏՅԱՆ
