2013թ. մայիսի 15-ին Նոյեմբերյանի զորամասում ժամկետային զինծառայող Լյուքս Ստեփանյանի սպանության գործով դատավարության ապրիլի 7-ի նիստում ցուցմունք տվեց ամբաստանյալ Դավիթ Խաչատրյանը: Նիստի սկզբում պաշտպան Երեմ Սարգսյանը հայտարարեց, որ Խաչատրյանը հոգեբանորեն պատրաստ չէ ցուցմունք տալու եւ 15 րոպե ընդմիջում խնդրեց: Դ. Խաչատրյանը պատմեց, որ Լյուքս Ստեփանյանի եւ նույն կրակոցից ծանր վիրավորված Հրաչյա Սարգսյանի հետ ունեցել է լավ հարաբերություններ: Դավիթը Հրաչյայի հետ ավելի մտերիմ է եղել, քանի որ ծառայության սկզբում միասին եղել են կարանտինի մեջ: Դ. Խաչատրյանն այդ օրը եղել է զորամասի պահակատան ժամապահ, հետո ժամ է հարցրել զորամասի տաղավարում գտնվող ծառայակիցներից: Դավիթն այդ ժամանակ կանգնել է հայելու առաջ, մաքրել դեմքի բշտիկը: Լյուքս Ստեփանյանը նրան կոչել է «պզուկ»: Լյուքս Ստեփանյանը մի քանի անգամ Դավթի անձին ուղղված սեռական բնույթի հայհոյանք է տվել, որին Դ. Խաչատրյանը պատասխանել է: Դ. Խաչատրյանի վկայությամբ՝ ինքը 2 անգամ չորացած հողի կտոր է նետել տաղավարի ուղղությամբ: Նա նախաքննական ցուցմունքում ասել է, որ ինքը քար է նետել:
Խաչատրյանի խոսքերով՝ ինքը եւ Լյուքսը կատակ էին անում, ինքը ինքնաձիգը մի ուսից մի մյուսն է փոխադրել, այն լիցքավորել՝ Լյուքս Ստեփանյանին վախեցնելու նպատակով: Նրա խոսքերով՝ ինքնաձիգը ուսից իջեցնելու ժամանակ, երբ այն հետ է տարել, զենքը դիպել է իր ենթապայուսակին, որից հետո կրակոց է արձակվել: Ամբաստանյալն ասաց, որ տեսնելով սպանված Լյուքս Ստեփանյանին եւ ծանր վիրավոր Հրաչյա Սարգսյանին լացել է, գոռացել, դեպքի վայրից չի փախել:
Ամբաստանյալի պաշտպաններ Երեմ Սարգսյանը եւ Վաղինակ Գեւորգյանը հարցեր ուղղեցին Դ. Խաչատրյանին, այնուհետեւ նրան հարցեր տվեցին մեղադրողներ Արթուր Զաքարյանը, Արթուր Անտոնյանը եւ տուժողի իրավահաջորդի ներկայացուցիչ Արմեն Սարգսյանը: Շատ հարցեր կրկնվում էին, ինչի պատճառով Երեմ Սարգսյանը այդ հարցերի դեմ առարկություն էր ներկայացնում: Դրանք դատավոր Զոյա Զաքինյանի կողմից բավարարվում էին: Պաշտպանական կողմը հայտարարեց, որ նախաքննության ընթացքում քննիչների կողմից թույլ են տրվել խախտումներ, Դ. Խաչատրյանին չեն բացատրվել իր իրավունքները, քննիչը միանգամից 5-6 հարցեր է ուղղել Դ. Խաչատրյանին, վերջինիս ցուցմունքներից որոշ բաներ չեն գրառվել: Դատական փորձարարության ժամանակ Դ. Խաչատրյանը եղել է առանց ենթապայուսակի:
Կարդացեք նաև
Պաշտպանական կողմը բացարկ հայտնեց մեղադրողներին: Դատավոր Զոյա Զաքինյանը միջնորդությունն անհիմն համարելով՝ այն մերժեց: Քանի որ ամբաստանյալի դատարանում տված ցուցմունքների եւ նախաքննական ցուցմունքների մեջ կային էական հակասություններ, պաշտպանները միջնորդեցին հրապարկել Դ. Խաչատրյանի նախաքննական ցուցմունքները եւ հարցաքննության տեսաձայնագրությունը: Պաշտպանական կողմը միջնորդեց կրկին դատարան հրավիրել վկաներ Հրաչյա Մարգարյանին, Արշակ Պետրոսյանին եւ Միշա Ջանազյանին, նաեւ հրապարակել Դ. Խաչատրյանի առերեսման արձանագրությունները; Դատավորը բավարարեց միայն առերեսման արձանագրությունների հրապարակման միջնորդությունը: Դատական հաջորդ նիստը կկայանա ապրիլի 17-ին:
Մանրամասները` տեսանյութում:
Ոսկան ՍԱՐԳՍՅԱՆ
