Ադրբեջանի Ժամանակակից Մուսավաթ կուսակցության նախագահ Հաֆիզ Գաջիևը խոստացել է անձամբ կտրել Ռուսաստանի Լիբերալ դեմոկրատական կուսակցության առաջնորդ, ՌԴ պատգամավոր Վլադիմիր Ժիրինովսկու ականջը, որն, ըստ նրա, վիրավորել է ադրբեջանցիներին: Հայտնում է «Հաքքին.ազ»-ը:
Ռուսաստանի խորհրդարանում ելույթ ունենալիս Ժիրինովսկին հայտնել էր, որ ադրբեջանցի ազգ գոյություն չունի, դրանք ընդամենը Կասպից ծովի ափերի բնակիչներն են:
«Ռուսերենից թարգմանաբար ի՞նչ է նշանակում Ադրբեջան: Ազերը Խազարն է, այսինքն՝ Կասպից ծովը, բաջան՝ երկրամասը: Այսինքն, մարդիկ, որոնք ապրում են Կասպից ծովի ափերի մոտ: Ռուսերենով՝ կասպեցիները: Ի՞նչ է դա, ազգությո՞ւն է, ինչ է: Դրանք մարդիկ են, որոնք բնակվում են որոշակի տարածքում», – ասել էր Ժիրինովսկին, ինչին ադրբեջանցի պատգամավորը պատասխանել է.
«Այդ վիրավորանքների համար ես անձամբ կկտրեմ նրա ականջը: Իսկ ով չի կարող արժանի պատասխան տալ Ժիրինովսկուն, ուրեմն նրանից ոչնչով չի տարբերվում»:
Կարդացեք նաև
Գաջիևը առաջին անգամ չէ, որ մարդկանց սպառնում է ականջ կտրելով: Ավելի վաղ նա սպառնացել էր կտրել ադրբեջանցի գրող Աքրամ Այլիսլիի ականջը, որը իր «Քարերի երազներ» վեպում հայերին դրական էր ներկայացրել: Հարկ է փաստել, որ Այլիսլիի երկու ականջներն էլ միչև օրս տեղում են:
Պատրաստեց Հովհաննես ԻՇԽԱՆՅԱՆԸ
