Ըստ «Ժողովրդավարական հայրենիք» կուսակցության ղեկավար Պետրոս Մակեյանի՝ ներկայումս Հայաստանում գոյություն չունի արտաքին քաղաքականություն, քանի որ մեր երկրի արտաքին քաղաքականությունը որոշվում է Ռուսաստանում. «Մեր ժողովուրդն էդքան զոհեր տվեց պատերազմում, բայց մեր անկախության երազանքը կարճ տեւեց»: Այդ մասին նա այսօր ասաց «Տեսակետ» ակումբում, սակայն նաեւ խոստացավ, որ ամեն ինչ անելու են, որպեսզի վերադարձնեն «անկախության երազանքն ու անկախ պետականությունը»:
Ինչ վերաբերում է ներքին քաղաքականությանը՝ պարոն Մակեյանը կարծում է, որ այստեղ էլ Ռուսաստանը դերակատարություն ունի, նա համամիտ է հնչող տեսակետին, որ վարչապետի հրաժարականը պարտադրված էր հենց ՌԴ կողմից: Ավելին, նա կարծում է, որ Տիգրան Սարգսյանին զոհաբերեցին՝ ոչ իշխանական քառյակը պահպանելու համար, որից դեռ սպասելիքներ ունեն: Այդուհանդերձ, Պետրոս Մակեյանը չի կարծում, որ ոչ իշխանականները դեր են ունեցել վարչապետի փոփոխության մեջ: Նա, ընդհանուր առմամբ, Հայաստանի պատմության ընթացքում եղած վարչապետերին բաժանում է կատարողների՝ օպերատորների եւ որոշողների: Վերջիններից եղել են միայն Հրանտ Բագրատյանն ու Վազգեն Մանուկյանը, իսկ մնացածը «օպերատորներ» են եղել, եւ հիմա էլ, Սերժ Սարգսյանը, ըստ Մակեյանի, պետք է «օպերատոր վարչապետ» գտնի, իսկ Քոչարյանն այդ դերին հարմար չէ: Եթե Քոչարյանը լինի, Սերժ Սարգսյանը կստանձնի անգլիական թագուհու դեր, ինչը, բնականաբար, նա չի ցանկանա:
Մելանյա ԲԱՐՍԵՂՅԱՆ
