Ծաղկաձորի երիտասարդական կենտրոնում այսօր Հայաստանի երիտասարդական հիմնադրամի (ՀԵՀ) գործադիր տնօրեն Ալեքսանդր Տեր- Հովակիմյանը խոսեց կառույցի նպատակներից եւ առաքելությունից, ասաց՝ հպարտ է, որ ՀԵՀ-ը իր նմանը չունի հանրապետությունում: Պարոն Տեր-Հովակիմյանը նշեց, որ ՀԵՀ-ի դահլիճները երիտասարդական նախաձեռնությունների տրամադրվում են անվճար: Ինչ վերաբերում է, Ծաղկաձորի երիտասարդական կենտրոնին, հավելեց, թե այստեղ 90 երիտասարդական ծրագիր են իրականացրել, 15000 երիտասարդ է այցելել Ծաղկաձորի երիտասարդական կենտրոն:
Համաժողովին անդրադարձ եղավ նաեւ ՀՀ Նախագահի հովանու ներքո իրականացվող Երիտասարդ գիտնականների աջակցության ծրագրին, որ շրջանակում ֆինանսական աջակցություն է տրամադրվում մրցութային հիմունքներով:
Aravot.am-ը հետաքրքրվեց՝ քանի՞ ընդդիմադիր հայացքներ ունեցող կամ ոչ ՀՀԿ-ական երիտասարդի է ֆինանսական աջակցություն տրամադրվել մինչ այժմ:
Ալեքսանդր Տեր-Հովակիմյանն ասաց, որ հիմնադրամ մտնող երիտասարդների քաղաքական նախասիրություններով չեն հետաքրքրվում: «Ես նման հաշվառում չեմ վարում, եթե վարեի, մեծ սիրով կպատասխանեի ձեր հարցին»,-ասաց նա: Նման պատասխան տվեց նաեւ ՀԵՀ-ի կրթաթոշակ ստացող ուսանողների մասին. «Բացառվում է, որ կրթաթոշակ ստացողները լինեն միայն ՀՀԿ-ականներ»:
Կարդացեք նաև
Նա հավաստիացրեց, որ չորս տարի է ՀԵՀ-ի գործադիր տնօրենն է, երբեւէ ընտրություններում չի հրահանգել քվեարկել ՀՀԿ-ի օգտին:
Գոհար ՀԱԿՈԲՅԱՆ
