ՀՀ ԿԲ նախկին նախագահ Բագրատ Ասատրյանն այսօր «Հայելի» ակումբում մի քանի ցուցանիշներ ներկայացրեց, թե ինչ վիճակում է Հայաստանի տնտեսությունը հայտնվել արդեն նախկին վարչապետ Տիգրան Սարգսյանի պաշտոնավարման ժամանակ: Պարոն Ասատրյանի խոսքերով` 2008 թվականին Հայաստանի ՀՆԱ-ն կազմում էր 11 միլիարդ 916 միլիոն դոլար, 2013-ին` 10 միլիարդ 300 միլիոն դոլար, մոտ 10%-ի անկում 5 տարիներին. «Բոլորս աղքատացել ենք, այսօր մենք ունենք ավելի շատ խնդիրներ եւ ավելի սուր են դրված այդ խնդիրները, քան 6 տարի առաջ»:
Aravot.am-ի այն դիտարկմանը, որ 2008-2009 ու հաջորդ տարում համաշխարհային տնտեսական ճգնաժամ էր, պարոն Ասատրյանն ասաց. «Իհարկե կար ճգնաժամ, բայց առաջինը մեր ուղեղներում է ճգնաժամը, ամբողջ աշխարհում եղել է ճգնաժամը, բայց բոլոր երկրները զարգանում են, իսկ մենք մնում ենք նախաճգնաժամային մակարդակի վրա»:
Ըստ Բագրատ Ասատրյանի, Տիգրան Սարգսյանը ՀՀԿ անդամ դարձավ վարչապետ նշանակվելուց հետո, խայտառակ բացասական երեւույթ է. «Այսինքն` հանրապետությունում չկա քաղաքական ուժ, որն իրեն պատասխանատու համարի առկա գործընթացների համար: Հանրապետական կուսակցությունը ոչ մի պատասխանատվություն չի կրում: Մեր պրոբլեմը վարչապետի անձի պրոբլեմը չէ, մեր պրոբլեմը քաղաքական համակարգի պրոբլեմն է: Իշխող քաղաքական ուժն է, որ հավաքագրել է փողատերերի, հաստ գրպանով մարդկանց. եթե այդպիսի քաղաքական ինտելեկտով մարդկանց հավաքագրեին այդ անվան տակ, իհարկե, մեր վիճակն ավելի լավ պետք է լիներ»:
Պարոն Ասատրյանի կարծիքով՝ մեր երկրում մտածող մեկ անձ կա, 2-րդին թույլ չեն տալիս մտածել: Մանրամասն՝ տեսանյութում
Կարդացեք նաև
ԲՀԿ անդամ, տնտեսագետ Վարդան Բոստանջյանն էլ ասաց, որ եթե հանկարծ ինքը նորից լիներ պատգամավոր, ապա օրենսդրական նախաձեռնությամբ հանդես կգար, եւ ապրիլի 3-ը կմտցներ տոների ու հիշատակների օրերի մեջ, որպես հայ իշխանության թշվառության օր. «Տեսեք էդ վիճակը, ոչ մեկը չի հասկանում ինչ է խոսում, ինչի համար է տեղի ունենում. սկզբից նիստ, հետո…»:
Պարոն Բոստանջյանի խոսքերով` «Ինչ վերաբերում է վարչապետի հեռացմանը, երեւի թե ավելի վաղ նա տրամադրված էր հեռանալու, բայց նրան չէին թողնում: Հասարակությունը շատ չխորանալով մտածում է, մեր բոլոր անհաջողությունների պատճառը այդ ֆիզիկական անձն է, իսկ իրականում հասկանալի է չէ՞, թե՞ ես պարզ չեմ խոսում: Հիմա չպետք է մտածել` թե ով կլինի, մտածենք համակարգային փոփոխության վերաբերյալ, որը կբերի երկրի կառավարման արդյունավետության բարձրացմանը: Պետք են այնպիսի մարդիկ, որոնք կնվիրվեն մեր կենսամակարդակի, մեր բարօրությանը»:
Aravot.am_ի այն հարցին, թե ԲՀԿ-ում կա՞ նման մարդ, պարոն Բոստանջյանն ասաց` ԲՀԿ-ին հարցրեք: Երբ մենք Վարդան Բոստանջյանին հիշեցրինք, որ ինքը եւս ԲՀԿ անդամ է, տնտեսագետը սկսեց նորից թվարկել մարդկային այն բարձրագույն արժեքները, որով, ըստ Բոստանջյանի, պետք է օժտված լինի ՀՀ վարչապետը:
Aravot.am-ի այն դիտարկմանն էլ, որ կարծիք կա, որ Հայաստանում վարչապետ են նշանակում կամ ԵՄ-ից կամ Ռուսաստանից, եւ արդյոք այս պարագայում հնարավորություն կա՞ Բոստանջյանի մատնանշած անձնավորությանը ինքնուրույն նշանակել վարչապետ, պարոն Բոստանջյանն ասաց, որ այո, Հայաստանն այնպիսի պետություն է, որ պետք է հաշվի առնի դրսի ուժերի կամքը, բայց նաեւ պետք է կարողանա այնպիսի դիվանագիտություն կիրառել, որը կլինի ի շահ Հայաստանի:
Նելլի ԲԱԲԱՅԱՆ
