Ապրիլի 3-ին ՀՀ քաղաքացիական ծառայության խորհրդի նախագահ Մանվել Բադալյանն ընդունեց Համաշխարհային Բանկի ավագ տնտեսագետ Ուլրիխ Բարչին: Հանդիպման նպատակն էր քննարկել ՀԲ օժանդակությամբ Հայաստանի քաղաքացիական ծառայության ոլորտում ընթացող բարեփոխումների և այդ շրջանակներում նախաձեռնված օրենսդրական փոփոխությունների ընթացքին վերաբերող հարցեր:
ՀՀ ՔԾԽ նախագահ Մանվել Բադալյանը կարևորեց ՀԲ-ի հետ համագործակցությամբ իրականացվող ծրագրերի շոշափելի արդյունքները, դրանց շարունակականության ապահովման անհրաժեշտությունը` հատկապես Խորհրդի կողմից մշակված և ԵՄ SIGMA ծրագրի շրջանակներում միջազգային փորձաքննության արժանացած «Քաղաքականության փաստաթղթի» կենսագործման տեսանկյունից:
Պարոն Բարչը, փոխանցելով այդ ձեռնարկումներին ՀԲ-ի կողմից աջակցության պատրաստակամությունը, կարևորեց հատկապես քաղաքացիական ծառայողների ատեստավորման ինստիտուտը բովանդակային փոփոխությունների ենթարկելու ուղղությամբ ներկայումս Հայաստանում տարվող աշխատանքները` քաղծառայողների ներուժի, կարողությունների և աշխատանքի արդյունավետության գնահատման ավելի կատարելագործված մեխանիզմներ ներդրելու նպատակով: ՀՀ ՔԾԽ նախագահը նշեց, որ քաղաքացիական ծառայության համակարգի զարգացման համար գնահատման չափորոշիչների մշակումը էական նշանակություն ունի, քանի որ դրանով է պայմանավորված պետական ծառայողների կողմից քաղաքացիներին մատուցվող ծառայությունների որակի բարձրացման հեռանկարը:
Խորհրդի նախագահի նախաձեռնությամբ քննարկման առարկա դարձավ նաև քաղաքացիական ծառայության պաշտոնների գնահատման և դրա արդյունքում նոր դասակարգման ենթարկելու, այս հարցում ՀԲ-ի կողմից մեթոդաբանական և փորձագիտական օժանդակություն ցուցաբերելու հնարավորության հարցը: Հաշվի առնելով, որ համակարգի զարգացման առումով այս հիմնահարցի լուծմանը տրվում է անկյունաքարային նշանակություն` պայմանավորվածություն ձեռք բերվեց ավելի ինտենսիվացնել համագործակցությունը և հնարավորինս արագացնել բարեփոխումների ընթացքը:
ԳՈՌ ԱԲՐԱՀԱՄՅԱՆ
ՀՀ քաղաքացիական ծառայության խորհուրդ
