Ապրիլի 3-ին տեղի ունեցավ ՀՀ նախագահի գործընկեր կազմակերպության` Հայաստանի երիտասարդական հիմնադրամի կողմից հայտարարված դրամաշնորհների ծրագրերի մրցութային հանձնաժողովի նիստը։ Քննարկվեցին ՀՀ նախագահի աշխատակազմի կողմից հատկացվող դրամաշնորհների համար դիմած և ընտրության նախնական փուլն անցած հասարակական կազմակերպությունների հայտերը: Հանձնաժողովի անդամները տարբեր չափորոշիչներով (ՀԿ-ի փորձ, ծրագրի նպատակներ և խնդիրներ, բյուջեի կետերի հստակ ներկայացում և այլն) գնահատեցին ծրագրերը։
Հայոց ցեղասպանության թանգարան-ինստիտուտի փոխտնօրեն Սուրեն Մանուկյանը, խոսելով ծրագրերի ընտրության սկզբունքների մասին, նշեց, որ իր համար ամենակարևոր չափանիշն արդյունավետությունն է։ «Ինձ համար գլխավորն այն է, որ ծրագիրն ունենա երկարաժամկետ հետևանք թողնող արդյունք։ Կարևոր է նաև կազմակերպության փորձը համապատասխան ոլորտում,- ասաց պարոն Մանուկյանը՝ ավելացնելով, որ Հայոց ցեղասպանության ինստիտուտ-թանգարանը և անձամբ ինքը պահելու են կապը Ցեղասպանության ճանաչմանն ուղղված անվանակարգերում հաղթած ՀԿ-ների հետ,- ես պարտավորվել եմ պահել կապը կազմակերպությունների հետ և հետևել ծրագրերի իրականացմանն ու արդյունքներին։ Սա էլ իմ հասարակական ներդրումն է դրամաշնորհային այս ծրագրին»։
ՀՀ տարածքային կառավարման նախարարության աշխատակազմի տարածքային կառավարման և զարգացման վարչության պետ Հայկ Գալստյանը փորձագիտական գնահատական տալով գյուղական համայնքների խնդիրներին առնչվող անվանակարգերում ներկայացված ծրագրերին, նկատեց, որ գնահատման թերթիկում առկա էին բոլոր անհրաժեշտ չափորոշիչները՝ ընտրություն կատարելու համար։ «Միշտ հնարավորություն կա այդ չափորոշիչներն ընդարձակելու։ Կարծում եմ՝ լավ կլիներ նաև որևէ ցուցիչ ընդգրկել՝ պարզելու համար, թե ծրագրերի իրականացման արդյունքում գյուղական համայնքների զբաղվածության ոլորտում ինչ փոփոխություններ կարձանագրվեն»,- նշեց Հայկ Գալստյանը։
ՀՀ նախագահի աշխատակազմի կողմից հատկացվող դրամաշնորհային մրցույթի արդյունքները պարզ կդառնան երկուշաբթի։
Կարդացեք նաև
Հայաստանի երիտասարդական հիմնադրամի
հասարակայնության հետ կապերի ծառայություն
