«Ddos-ը շատ վտանգավոր երեւույթ է այն առումով, որ կայքին ձեռք չեն տալիս, պարզապես վարակված համակարգիչներից դեպի կայք ուղղորդվում է ինտերնետային աղբ»,- այսօր՝ ապրիլի 3-ին՝ լրագրողների հետ հանդիպման ընթացքում, անդրադառնալով Ddos հարձակումներին, հայտարարեց մեդիափորձագետ Սամվել Մարտիրոսյանը:
Նրա խոսքերով՝ վերջին կես տարվա ընթացքում Հայաստանի ուղղությամբ եղել են 4 խոշոր Ddos հարձակումներ, որոնցից վերջինը եղել է երեկ: Սամվել Մարտիրոսյանն ասաց, որ այս հարձակումների պատճառով շատ օգտատերերի մոտ վատանում է ինտերնետային կապը, եղել են նաեւ դեպքեր, որ հայկական կայքերը չեն բացվել, կամ բացվել են միայն Հայաստանի տարածքում.
«Վերջին հարձակումը, որ երեկ եղավ, իր պիկը հասավ 50 գիգաբիթի: Իհարկե՛, լավ է այն, որ հարձակումը ինչ-որ պահից սկսեց կասեցվել ավելի լայն մայրուղիների վրա, այսինքն՝ Ռուսաստանից եկող մայրուղիների վրա, բայց հարցը նրանում է, որ այդ կասեցումը որոշ ժամանակ է պահանջում»:
Մեդիափորձագետը նշեց, որ Ddos-ը կարելի է պատվիրել ու շուկայում, եւ այդ ծառայությունների գինը էժանանում է, քանի որ նոր մեթոդներ են առաջացել, գինը տատանվում է 50-200 ԱՄՆ դոլարի սահմաններում: Սամվել Մարտիրոսյանը հայտարարեց, որ երեկ կատարված հարձակումը այդ մեթոդներից մեկով է կատարվել.
Կարդացեք նաև
«Այս հարձակումները, որ գնալով աճում է, մեզ պետք է հուշեն, որ ժամանակն է գալիս ազգային մակարդակով մտածել երկրի պաշտպանության մասին, ոչ թե ամեն պրովայդերը իր պաշտպանության մասին մտածի»:
Մեդիափորձագետի խոսքերով՝ դժվար է պարզել, թե ով է կատարում հարձակումը, քանի որ այն կատարվում է աշխարհի տարբեր ծայրերից:
Ամի ՉԻՉԱԿՅԱՆ
