Այսօր լրագրողների հետ հանդիպման ժամանակ առողջապահության նախարարության աշխատակազմի ղեկավար Սուրեն Քրմոյանն ասաց` ակնկալում է, որ հաջորդ տարի վերացրած կլինեն պալիատիվ (ամոքիչ) բուժօգնության շրջանակներում հիվանդների համար թմրադեղերի ձեռքբերման բոլոր խոչընդոտները:
«Այս պահի դրությամբ ցավազրկող դեղորայքի, եւ այդ թվում` թմրամիջոցների պակաս հանրապետությունում չունենք: Խնդիրը այստեղ այն է, որ եւ´ հիվանդը, եւ´ բժիշկը շատ հաճախ խուսափում են եւ դրա պատճառով նրանց չի հատկացվում դեղամիջոցը: Այս պահի դրությամբ բոլոր համախտանիշ ունեցողներին, մասնավորապես, օնկոլոգիական հիվանդություն ունեցողներին, դեղորայքը տրվում է անվճար»:
Իսկ Առողջապահության իրավունքի տնօրեն Վիոլետա Զոփունյանը նշեց, որ բժիշկները խուսափում են օգտագործել նման հոգեմետ դեղամիջոցներ, քանի որ խուսափում են պատասխանատվությունից: «Ներկայումս գործող թմրամիջոցների սխալ կիրառման դեպքում, բժիշկը ենթարկվում է պատասխանատվության: Սա է վախ առաջացնում բժիշկների մոտ, իսկ մյուս կողմից էլ չկա հստակ ընթացակարգ, որի հիման վրա նրանք կարող են նշանակումներ անել»:
Իսկ գիտությունների դոկտոր Սթիվեն Քոննորը հավելեց, որ այսօր Հայաստանի Հանրապետությունը օգտագործում է կես կիլո մորֆի տարեկան, իսկ միջազգային նորմերին հասնելու համար պետք է օգտագործել մոտավորապես` 26: «Սրա հիմնական պատճառն այն է, որ Բժշկական համալսարանում սովորեցնում են նման դեղամիջոցներ չնշանակել, բայց հակառակը` պետք է սովորեն հենց նման դեղամիջոցներ նշանակել, քանի որ սրանց միջոցով կարելի է արդյունավետ պայքարել ցավի դեմ»:
Կարդացեք նաև
Հատկանշական է այն, որ ցավային ախտանիշի դեպքում, երբ օգտագործում են թմրամիջոցներ, կախվածություն ձեռքբերելու հավանականությունը քիչ է: Պալիատիվ օգնությունը թեթևացնում է հիվանդի ցավերը (բոլոր տեսակի սուր ցավեր), այլ ոչ թե` առաջացնում կախվածություն:
Դիանա ԹՈՐՈՍՅԱՆ
