Aravot.am-ը ՀՀ քաղաքացիներից հետաքրքրվեց, թե ի՞նչ կարծիք ունեն երեկ Սահմանադրական դատարանի կայացրած այն որոշման վերաբերյալ, որ պարտադիր կուտակային կենսաթոշակային համակարգի մի շարք վիճահարույց դրույթներ համարվել են հակասահմանադրական:
Հարցվածների մեծ մասը համամիտ էին Սահմանադրական դատարանի որոշման հետ:
«Ես գտնում եմ, որ պարտադիր բաղադրիչը պետք է ընդհանրապես դուրս գա այդ օրենքից, ինչո՞ւ պետք է պետությունը թոշակառուներին կենսաթոշակով ապահովի պարտադիր կերպով: Շատ սխալ եմ համարում այն հանգամանքը, որ մինչեւ սեպտեմբերի 30-նն էլ դեռ պետք է վճարեն: Եթե մինչեւ սեպտեմբերի 30-ը հավաքեն, կառավարությունը չի կարողանա այդ գումարը ետ վերադարձնել»,- ասաց հարցվածներից մեկը:
Մեզ հետ զրույցում մի երիտասարդ՝ մասնագիտությամբ ծրագրավորող, որը չցանկացավ ներկայանալ եւ խոսել տեսախցիկի առաջ, իր վրդովմունքն արտահայտեց հետեւյալ կերպ. «Ես ծրագրավորող եմ եւ ստանում եմ բավականին բարձր աշխատավարձ: Եթե իմ աշխատավարձի 5 տոկոսը պարտադիր կերպով պահեն, արդեն իսկ ես մեծ կորուստ եմ կրում գումարային առումով: Պետք է հանել պարտադիր բաղադրիչը: Դա արդեն իմ խնդիրն է, ես կամավոր կվճարեմ իմ ապագա կենսաթոշակի համար, թե՝ ոչ»:
Կարդացեք նաև
Հարցվածների շրջանում կային մարդիկ, որոնք կողմ էին պարտադիր բաղադրիչին: Սակայն տեսախցիկի առջեւ խոսել չցանկացան:
Նման կարծիք հայտնեց հարցվածներից մեկը. «Երբեք այս համակարգին դեմ չեմ եղել, այս համակարգը առանց պարտադիր բաղադրիչի համակարգ չի դառնա: Ես կարծում եմ, որ մարդիկ առանց պարտադրանքի, կամավոր չեն վճարի: Դրա համար պարտադիրը շատ ճիշտ որոշում է»:
Էլյա ՀՈՎՀԱՆՆԻՍՅԱՆ
