«Մեկը, ով 640 հազար դրամ աշխատավարձ է ստանում նվազագույնը, չհաշված բազմաթիվ այլ հարցեր`ավտոսպասարկում եւ այլն, այդ մարդը համարձակվում է ցավ հայտնել, որ որպես նախագահի թեկնածու ահաբեկչության ենթարկված մարդուն պետությունն օգնել է ինչ-որ չափով»,- այսօր «Տեսակետ» մամուլի ակումբում իր վրդովմունքն արտահայտեց ԱԻՄ նախագահ Պարույր Հայրիկյանը`անդրադառնալով ՀՀ մարդու իրավունքների պաշտպան Կարեն Անդրեասյանի 2014 թվականի տարեկան զեկույցին:
ՄԻՊ-ի զեկույցը Հայրիկյանն անպարկեշտ է համարում. «Հայրիկյանը բնական է պիտի մեռներ: Ամբողջ կյանքը սրա նմանների համար, Հայաստանի անկախության ու ազատության համար բանտերում անցկացներ, հետո գար անվճար աշխատեր ՄԻՊ-ի պաշտոնում, իսկ ինքն աշխատի բարձր աշխատավարձով: Հայրիկյանն ունենար չորս հոգանոց աշխատակազմ եւ ավելի արդյունավետ գործեր, քան իրենք են գործում, որովհետեւ այն ժամանակ բանակն ու բանտերը սարսափում էին այդ փոքր հանձնաժողովից: Էլ չեմ խոսում նրա մասին, որ Հայրիկյանը նաեւ ազատամարտիկ է, ոչ միայն ազատամարտիկ, այլ ամենավտանգավոր շրջանի պարետն էր`նշանակված լինելով երկու ամիս, չորս տարի է ծառայել…»:
Հայրիկյանին զարմացնում է, որ Կարեն Անդրեասյանն իր հիմնական բան ու գործը`ՀՀ քաղաքացիներին իշխանության ոտնձգություններից պաշտպանելը, թողած, այդ թվում նաեւ Հայրիկյանին պաշտպանելու իրական ահաբեկչությանը հետեւած քարոզչական ալիքից, հաստատում է այն պնդումները, որ իբր Հայրիկյանն այդ ամենն արեց պետությունից փող պոկելու համար: «Այդ երիտասարդիկը այսօր այդ բոլոր ստորությունները շարունակում է»,- ասաց Հայրիկյանն՝ ամոթանք տալով Կարեն Անդրեասյանին ու հավելելով, թե շատ բաներ գիտի, որոնց մասին չի խոսում. «Միայն մի փաստ բերեմ. ԵՄ-ն 700 հազար եվրոյի օգնություն հատկացրեց ՄԻՊ-ի հանձնաժողովին: Մարզերում ձեւականորեն մի քանի գրասենյակներ բացվեցին ու փակվեցին: Գնվեցին վեց ավտոմեքենաներ, չորսն ունենալու դեպքում: Իմ հանձնաժողովում միայն մեկ ավտոմեքենա կար, բայց մենք հասցնում էինք բոլոր վտանգավոր գոտիներում լինել: Ավտոմեքենաների համարներով կարող եմ ասել, թե որ ինքնաշարժն ինչ նպատակի է ծառայում: Այսինքն, այդ մարդը չի համապատասխանում մարդու իրավունքներին սատարելու իր առաքելությանն, այլ զբաղված է իր պաշտոնն իրեն ծառայեցնելու ոչ պատվաբեր գործով»:
Այլ մանրամասները` տեսանյութում
Նելլի ԳՐԻԳՈՐՅԱՆ
