Քիչ առաջ կառավարության նիստին ՀՀ վարչապետ Տիգրան Սարգսյանը անդրադարձավ օրերս ցրտահարությունից եւ կարկտահարությունից տուժած գյուղացիական տնտեսությունների կրած վնասներին: Վարչապետն ասաց, որ եղանակային պայմանների պատճառով գյուղացիական տնտեսությունները լուրջ վնասներ են կրել, 2-3 օրում կամփոփվեն վնասի ծավալները: Վարչապետի խոսքերով՝ մոտ 11.500 հեկտարի վրա արձանագրվել են վնասներ. «Մարզպետներն ու գյուղնախարարությունը փորձում են ճշտել վնասի չափերը: Մենք օգնելու ենք վնաս կրած բոլոր գյուղացիներին, պարարտանյութ, սերմացու կտրամադրենք, որպեսզի այս տարին նրանք կորցրած չլինեն»:
Տիգրան Սարգսյանը դիմեց ԿԲ նախագահ Արթուր Ջավադյանին՝ ասելով, որ գյուղացիները նաեւ վարկային խնդիրներ ունեն: Ջավադյանի խոսքերով՝ ներկայումս ուսումնասիրվում է այդ խնդիրը եւ աշխատանքներ են տարվում բանկերի ու վարկային կազմակերպությունների հետ. «Խոսքը մոտ 65 մլրդ դրամի մասին է»:
Վարչապետ Տիգրան Սարգսյանը խոստացավ, որ պետբյուջեն կաջակցի գյուղացիներին, որպեսզի ապահովվեն գարնանացանն ու աշնանացանը:
Նելլի ԲԱԲԱՅԱՆ
