Ինչպես տեղեկացրել ենք, այսօր «Սուրբ Աստվածածին Յոթ Վերք» եկեղեցում տեղի ունեցավ ժամերգություն ու ընդհանրական աղոթք` նվիրված քեսաբահայությանը:Կազմակերպիչներից մեկը` «Սուրբ Աստվածածին Յոթ Վերք» եկեղեցու երիտասարդաց միության պատասխանատու Կարեն Պետրոսյանը, Aravot.am-ի հետ զրույցում ասաց, որ իրենց ձայնը բարձրացնելով առ Աստված ակնկալում են, որ խաղաղություն հաստատվի Քեսաբում ու չկրկնվի ցեղասպանությունը: Ըստ նրա, դիվանագիտական քայլերից, զատ իրենք հույսը դնում են Աստծո վրա:
Մեր այն հարցին, թե 21-րդ դարում էլ պրծում չունե՞նք թուրքերից, Կարեն Պետրոսյանն այսպես արձագանքեց. «Ինչքան մենք հասկանում ենք, թուրքը մնում է թուրք, և թուրքը ոչ թե ազգություն է, այլ կատեգորիա է: Այսինքն` ցեղասպանություն կազմակերպող ցանկացած ազգի կարելի է թուրք անվանել: Եվ իզուր չէ, որ մեր լեզվամտածողության մեջ բոլոր արատավոր բաներն ասում ենք` հո դու թուրք չե՞ս: Այսինքն` այդ արտահայտությունը չի վերաբերում բուն ազգության, այլ մարդու տիպին, տեսակին և էսօր շատ անհասկանալի է աշխարհի արձագանքը Քեսաբում տեղի ունեցած դեպքերին: Կարծես թե լռության է մատնում: Քեսաբը լռության մեջ է և շատ քիչ ձայն է բարձրացվում. հայտնվելով տարբեր գերտերությունների շահերի կենտրոնում` քեսաբցիները ոնց, որ մենակ են մնացել աշխարհի դեմ, այսինքն` բռնությունների դեմ և բնականաբար թե մեր գերատեսչական կառույցները` արտաքին գործերի նախարարությունը և այլն, և թե նաև մյուս բոլոր համակարգերը` հասարակություն և այլն, պետք է ամբողջությամբ կարողանան համատեղ ջանքերով հարցը ներկայացնել միջազգային հանրությանը և փորձեն գտնել լուծումներ: Որովհետև, եթե որևէ մեկ եվրոպամետ կամ ուրիշ գրանտային ծրագիր է լինում, մեր ազգայնականները բղավում, բղավում են, և բղավում են, բայց արի ու տես, որ նման հարցերում, որն շատ ավելի ազգայնական ու ազգային հարց է, շատ-շատերը դժբախտաբար լռում են»:
Նունե ԱՐԵՎՇԱՏՅԱՆ
