«Հայաստանը կարող է իր հարգանքի տուրքը մատուցել նախկինում կատարված վայրագությունների զոհերի հիշատակին և ապահովել ապագա սերունդների պաշտպանությունը օրենքի գերակայության միջոցով` միանալով Միջազգային քրեական դատարանին (ՄՔԴ)»,- ասում է «Միջազգային քրեական դատարանի համար» կոալիցիան:
Սույն թվականի ապրիլ ամսին Կոալիցիայի` Համընդհանուր արդարադատությանն ուղղված քարոզարշավի կենտրոնում Հայաստանն է:
Կոալիցիան կոչ է անում պետություններին վավերացնել Հռոմի կանոնադրությունը, որի հիման վրա ստեղծվել է միակ մշտական հիմունքներով գործող միջազգային դատարանը, որն իրավասու է քրեական արդարադատություն իրականացնել առանձնապես ծանր հանցագործություններ կատարած անձանց նկատմամբ:
«Միջազգային արդարադատության մեխանիզմները, որոնցից է Միջազգային
քրեական դատարանը, ձգտում են արձանագրել պատմական իրադարձություններն, ինչպիսիք են ցեղասպանությունը, մարդկության դեմ ուղղված հանցագործությունները, պատերազմական հանցագործությունները:
Միևնույն ժամանակ, դրանք կարող են կանխել նման հանցագործությունների կրկնությունը,- ասում է Քաղաքացիական հասարակության ինստիտուտ ՀԿ ներկայացուցիչ Տաթևիկ Ղարիբյանը և հավելում: -Մենք հույս ունենք, որ մեր կառավարությունը հնարավորինս շուտ կվավերացնի Հռոմի կանոնադրությունը: Հայաստանը Մքդ–ին իր անդամակցությամբ հարգանքի տուրք կմատուցի անցյալի զոհերի հիշատակին և կնպաստի ապագայում նոր հնարավոր զոհերի կանխմանը»:
ՀՀ նախագահ Սերժ Սարգսյանին ուղղված նամակում Կոալիցիան կոչ է անում Հայաստանին անհրաժեշտ քայլեր ձեռնարկել՝ միանալու 122 այլ պետություններին, որոնք ՄՔԴ-ի անդամ են և աջակցել անպատժելիության վերացմանը:
Չնայած Հայաստանը ստորագրել է Հռոմի կանոնադրությունը 1999թ.-ին, սակայն ՀՀ Սահմանադրական դատարանը 2004թ.-ին որոշում է կայացրել, որ այն չի համապատասխանում ՀՀ Սահմանադրությանը:
