Քիչ առաջ մի խումբ Հայաստանի քաղաքացիներ եւ քեսաբահայեր Հայաստանում ԱՄՆ դեսպանատան առջեւ բողոքի ակցիա են սկսել՝ դատապարտելով Քեսաբում Թուրքիայի կատարած գործողությունները:
Նրանք ԱՄՆ-ի եւ միջազգային հանրության ուշադրությունն են հրավիրում Քեսաբում տեղի ունեցածի վրա: «Պահանջում ենք, որ ԱՄՆ-ն դատապարտի Թուրքիային նաեւ որպես ՆԱՏՕ-ի անդամ, քանի որ հենց այդ սահմանից են ջոկատները հատել Սիրիայի սահմանը, քանի որ հենց թուրքական ռազմական ուժերն են մասնակցել հայկական գյուղի գնդակահարությանը: ԱՄՆ-ն պետք է դատապարտի, իսկ ՄԱԿ-ի անվտանգության խորհուրդը պետք է քննարկի քեսաբցիների եւ քրիստոնյաների հարցը Քեսաբում»,- ասաց ակցիայի մասնակից Լեւոն Հովհաննիսյանը:
Ըստ նրա՝ Քեսաբում կատարվածի վերաբերյալ ԱՄՆ-ի կողմից դատապարտող կոչեր եղան, բայց դրանք հստակ չէին. «ԱՄՆ-ն հայտարարեց, որ մտահոգված են տեղի ունեցածով, բայց Թուրքիայի մասնակցության մասին որեւէ խոսք չասաց: Մի պարզ պատճառով՝ որովհետեւ Թուրքիան ԱՄՆ գործընկերն է, ՆԱՏՕ-ի անդամ եւ ընդհանուր շահեր ունեն Սիրիայում: Կարծում եմ՝ միջազգային հանրությունն ու ԱՄՆ-ն այստեղ անկեղծ չեն: Եթե խաղաղության կողմնակից են, ապա պետք է շատ խիստ դատապարտեն Թուրքիայի այս քայլը»:
Կարդացեք նաև
Քաղաքացիներին դեսպանատան բակում հանդիպեց Հայաստանում ԱՄՆ փոխդեսպան Քլարք Ֆրայսը, լսեց նրանց պահանջները:
Քլարք Ֆրայս
Aravot.am-ը փոխդեսպանից հետաքրքրվեց՝ ինչո՞ւ է խաղաղության կոչերով մշտապես հանդես եկող ԱՄՆ-ն միայն մտահոգություն հայտնել Քեսաբում կատարվածի մասին ու չի դատապարտել Թուրքիայի գործողությունները Քեսաբում: Փոխդեսպանն ասաց. «Այն հայտարարությունն, ինչ արել է պետդեպարտամենտը, կայքում դրված է եւ ես դրան ավելացնելու ոչինչ չունեմ»:
Արփինե ՍԻՄՈՆՅԱՆ
