«Թուրքիայի երախից, Թուրքիայի ճիրաններից պոկված մի կտոր էր Քեսաբը»,-այսօր՝ ապրիլի 1-ին՝ լրագրողների հետ հանդիպման ընթացքում հայտարարեց «Ազգ» թերթի խմբագիր Հակոբ Ավետիքյանը: Նրա խոսքերով՝ ի տարբերություն նման այլ իրադարձությունների՝ այս անգամ հայկական մամուլը բուռն արձագանքեց, սակայն այն չկարողացավ դեպքերը լավ վերլուծել:
Իսկ տեղեկատվության անվտանգության փորձագետ Տիգրան Քոչարյանը հայտարարեց, որ Ռուսաստանը հիմա օգտագործում է իր բոլոր տեղեկատվական զենքերը, որպեսզի ամրապնդի հակաամերիկյան տրամադրությունները: Փորձագետը համարում է, որ Ռուսաստանը շահագրգռված է ոչ թե Քեսաբի հայերի կյանքով, այլ ուղղակի ինքն իր հարցերն է լուծում:
Անդրադառնալով ռուսական լրատվամիջոցների կողմից տարածած տեսանյութերին՝ նա հայտարարեց, որ արդեն բոլորն էլ գիտեն, որ նյութը կեղծ է, որից եւ օգտվեցին թուրքերն ու ադրբեջանցիները.
«Թուրքական-ադրբեջանական քարոզչամեքենան սկսեց աշխատել այն ուղղությամբ՝ «տեսե՛ք, ինչպես 15 թվականին էին ինչ-որ սուտ հայտնություններ տալիս հայերը, հիմա էլ նույն բանն է կատարվում: Այսպես է եղել նրանց ցեղասպանությունը՝ վերցրել են ուրիշ զոհերին եւ ներկայացրել են որպես իրենց»:
Կարդացեք նաև
Տիգրան Քոչարյանը կարծում է, որ արտաքին գործերի նախարարությունը սկզբում ցանկանում էր հասկանալ, թե ի՞նչ է կատարվում Քեսաբում եւ այն աշխատում է իր հնարավորությունների միայն 10 տոկոսով.
«Իմ կարծիքով՝ արտաքին գործերի նախարարությունը պետք է գլոբալ ռազմավարություն մշակի, որովհետեւ այնպիսի տպավորություն է, որ համայնքներին հիշում ենք միայն այն ժամանակ, երբ որ պետք է փող հավաքել կամ մարաթոնի ընթացքում, մնացած իրավիճակներում համայնքները բարձիթողի վիճակում են»:
Ամի ՉԻՉԱԿՅԱՆ
