«Բանակը մեր ընտանիքն է, մենք հայավարի ենք դողում մեր բանակի համար եւ նրանում որեւէ բացթողում մեր բոլորի ցավն է: Բայց լավ կլիներ, որ մեր եվրոպացի գործընկերները ուզեին տեսնել նաեւ այն հսկայական աշխատանքը, որը առկա է եւ անվիճելի փաստ մեր բանակում»,- այսօր Aravot.am-ի հետ զրույցում ՀՀԿ խմբակցության պատգամավոր Մարգարիտ Եսայանն այսպես մեկնաբանեց «Եվրոպական հարեւանության քաղաքականության իրականացման առաջընթացի 2013-ի տարեկան զեկույցը», որտեղ մտահոգիչ գնահատականներ կան զինված ուժերում մահվան դեպքերի հետ կապված:
Զեկույցում նշվում է, որ «Զինված ուժերում ոչ մարտական պայմաններում արձանագրված կասկածելի մահվան դեպքերը, ինչպես նաեւ ծաղրուծանակի եւ զինակոչիկների նկատմամբ վատ վերաբերմունքի դեպքերը մտահոգություն են առաջացնում»:
Այդ զեկույցում դժգոհություն կա նաեւ կոռուպցիայի բարձր մակարդակի հետ կապված: Մասնավորապես ասվում է՝ «Հայկական հասարակության մեջ քաղաքական ուժերի եւ տնտեսական շահերի սերտաճում է նկատվում, ինչը հանգեցնում է որոշումների կայացման անթափանցիկությանը: Շատ քիչ գործողություններ են ձեռնարկվել բարձր ատյաններում կոռուպցիայի դեմ պայքարի համար: Էթիկայի հանձնաժողովը դեռ արդյունավետ չի գործում եւ ուժեղացման կարիք ունի»:
Մարգարիտ Եսայանի մեկնաբանությամբ՝ «Իսկ ո՞վ է ասում, թե կոռուպցիան արդեն սեւ աղվես է դարձել: Այո, այն կա, բայց կա նաեւ դրա դեմ իրականացվող աշխատանքը: Եվ եթե ԵՄ մեր գործընկերները իրենց շուրջը լավ նայեն, կտեսնեն, որ այդ աղվեսը իրենց միջից էլ չի հեռացել»:
Կարդացեք նաև
Զեկույցում ԼՂՀ հարցի հետ կապված նշված է, որ «սպառազինությունների մրցավազքը, ռազմատենչ հռետորաբանությունը, ինչպես նաեւ դեպի Լեռնային Ղարաբաղ հնարավոր թռիչքների շուրջ լարումները խոչընդոտել են կառուցողական մթնոլորտի ձեւավորմանը»:
Ըստ Մարգարիտ Եսայանի, «Նորություն չէ, որ ԵՄ-ն վաղուց է ձգտում միջամտել եւ մասնակից լինել ղարաբաղյան հարցի կարգավորման գործընթացին եւ նույնքան վաղուց էլ գիտի մեր արձագանքը` մեզ բավարարում է ԵԱՀԿ Մինսկի խմբի ձեւաչափը հարցի կարգավորման գործընթացում: Իսկ սպառազինությունների մասին ԵՄ-ն ճիշտ կանի խոսի ոչ թե մեզ հետ, այլ` մեր ռազմատենչ հարեւանի: ԵՄ որոշ պաշտոնյաներ շատ լավ գիտեն ռազմատենչի տեղը»:
Որպես հանձնարարություն՝ ԵՄ-ն 2014-ի համար իշխանությանն առաջարկում է՝ «Լիարժեք հետաքննել 2008թ. մարտի ընդհարումների ընթացքում տեղի ունեցած մահվան դեպքերը եւ ոստիկանական կալանքում վատ վերաբերմունքի մասին հայտարարությունները: Մեր հարցին՝ ինչքանո՞վ են իշխանություններն այսօր պատրաստ գնալ այս քայլին եւ բացահայտել Մարտի 1-ի սպանությունները՝ Մարգարիտ Եսայանը պատասխանեց. «ԵՄ-ն կառաջարկի թե ոչ, Մարտի 1-ի տասը սպանությունների բացահայտումը մեր բոլորի գործն է, մեր ցավը եւ ամոթն է, որ այդ սպանությունները դեռ չեն բացահայտվել: Այնպես որ, մենք իհարկե զգացված ենք բարեկամական այս դիտարկումների համար, բայց մեզնից լավ եւ մեզնից սրտացավ ոչ ոք չի կարող լինել մեր խնդիրները լուծելու հանձնառության մեջ»:
Հռիփսիմե ՋԵԲԵՋՅԱՆ
