Տաղանդավոր քանոնահար Նարեկ Կազազյանը վերջերս է վերադարձել Շվեյցարիայից, որտեղ համերգներ է ունեցել մի քանի քաղաքում, այդ թվում՝ Ցյուրիխում: Aravot.am-ի հետ զրույցում երաժիշտը նշեց, որ համերգներն ուղեկցվել են «բրավոներով», ներկայացվել է մեծ ծրագիր, որտեղ ներառված են եղել ինչպես բուն հայկական ստեղծագործություններ, մշակումներ, այդպես էլ արեւմտաեվրոպական կոմպոզիտորների երկեր: Հրավերը Heres հայ-շվեյցարական կազմակերպության կողմից էր, համերգները հնարավոր են դարձել «Արվեստների պատկերասրահ» հիմնադրամի նախագահ եւ պրոդյուսեր Մարիամ Շահինյանի ջանքերով, ՀՀ մշակույթի նախարարության աջակցությամբ:
Նարեկ Կազազյանը հայտնեց, որ ներկայումս պատրաստվում է Թուրքմենիայում կայանալիք մշակութային օրերին, որոնք նախատեսված են ՀՀ նախագահի այցի շրջանակներում: «Ապրիլի յոթին Թուրքմենիայում մշակույթի օրեր են լինելու, այդ ծրագրում նաեւ ես եմ ընդգրկվել, պետք հանդես գամ Հայաստանի ազգային նվագարանների պետական նվագախմբի հետ, որը ղեկավարում է գեղարվեստական ղեկավար եւ գլխավոր դիրիժոր Նորայր Դավթյանը»,-հավելեց մեր զրուցակիցը:
Մեր այն դիտարկմանը, թե ինքը քիչ է երեւում բեմերում, Նարեկ Կազազյանը պատասխանեց. «Ամեն ինչ ունի իր ժամանակը, եւ ամեն համերգի համար չէ, որ քանոնը հարմար է: Այս տարին հագեցած է եղել համերգներով, գուցե դրանք քիչ են լուսաբանվել: Օրինակ` համերգներ ենք ունեցել Սլավոնական համալսարանում, Սունդուկյանի անվան ազգայի ակադեմիական թատրոնում, Սիրահարների այգում, Նախագահի նստավայրում…»:
Նարեկ Կազազյանը պատմեց, որ քանոնին զուգահեռ այժմ նաեւ դաշնամուր է սովորում ու ահագին ձեռքբերումներ ունի, չնայած քանոնի պրոպագանդումն իր համար առաջնային է մնում:
Aravot.am-ի հարցին՝ ի՞նչ է այսօր պակասում երիտասարդ երաժիշտներին՝ հայտնի դառնալու եւ հաջողություններ գրանցելու համար, Նարեկ Կազազյանը պատասխանեց. «Պետք է մարդկանց երեւալու հնարավորություն տալ, եւ ամենակարեւորը՝ ճիշտ մարդկանց հնարավորություններ տրամադրել: Ցավոք այսօր պատկերն այլ է: Վերցնենք թեկուզ քանոնի պրոպագանդումը: Երբեմն, ոմանք քանոնը ցույց տալով, ասում են՝ նայիր բալես, սա թավջութակ է կամ՝ նայիր բալես՝ դաշնամուր է: Ինձ թվում է հենց Հայաստանից պետք է սկսել նվագարաններին ծանոթացումը եւ պրոպագանդումը: Եթե մենք մեր ազգայինը չպահենք ու չարժեւորենք, ոչ ոք մեր փոխարեն դա չի անելու»:
Հիշեցնենք, որ Վանաձորում սովորող եւ բնակվող, Միքայել Թավրիզյանի անվան արվեստի պետական քոլեջի ուսանող Նարեկ Կազազյանը 2012-ին դասական «Եվրատեսիլ» մրցույթում զբաղեցրեց երրորդ տեղը՝ բարձր պահելով Հայաստանի անունը:
Գոհար ՀԱԿՈԲՅԱՆ
