«Դոն Կիխոտ» հիմնադրամն այսօր «Ցեղակրոն» կուսակցության նախագահ, քաղբանտարկյալ Շանթ Հարությունյանին ճանաչել է տարվա ասպետ:
«Դոն Կիխոտի կերպարը առանձնանում է մյուս մեծություններից, առանց բացառության վայելում է բոլոր ժողովուրդների համակրանքը: Թույլին, թշվառին սատարելու անսահմանափակ բարությամբ օժտված կերպարը պատկանում է բոլորին…Մեր կարգախոսն է՝ մարդիկ մի վախեցեք մի քիչ դոն Կիխոտ լինելուց»,-նախքան ասպետի պատվոգիրը Շանթ Հարությունյանի որդուն հանձնելը իրենց հիմնադրամի մասին ասաց հիմնադրամի հիմնադիր Վարդան Վարդանյանը:
Նա նաեւ հետո ասաց, թե ինչու է հիմնադրամի հոգաբարձուների խորհուրդը որոշել, ասպետի առաջին կոչումը տվել Շանթ Հարությունյանին. «Շանթի հայտնի ընդվզումը ներկայումս Հայաստանում տիրող կարգերի, անարդարության, ժողովրդին ծայրահեղ վիճակի հասցրած վարչակազմի դեմ համահունչ է հիմնադրամի նպատակներին: Մեր հոգաբարձուների խորհուրդը Շանթ Հարությունյանին գնահատում է որպես իրական հերոս, մեր ժամանակների իսկական դոն Կիխոտ՝պայքարող հանուն ազատության, արդարության եւ ժամանակակից դեւերի դեմ»:
Շահեն Հարությունյանն էլ շնորհակալություն հայտնեց՝ վերցնելով հիմնադրամի պատվոգիրը եւ ասաց, որ այն բոլոր քաղբանտարկյալներինն է ու ասաց՝ վստահ է, որ նրանք շուտով ազատ կարձակվեն եւ կիրականացնեն հանուն ազատ, անկախ Հայաստանի ծրագիրը:
Կարդացեք նաև
Հիմնադրամը Շանթ Հարությունյանին էր տրամադրել նաեւ հարյուր հազար դրամի պարգեւ, բայց Շանթ Հարությունյանի հանձնարարությամբ այն փոխանցվեց Շանթ եւ ազատություն հիմնադրամին:
Արփինե ՍԻՄՈՆՅԱՆ
