«Ամերիկայի ձայն». Ռուսաստանը սպառնացել է որոշ պետություններին, որպեսզի վերջիններս չքվեարկեն Ղրիմում հանրաքվեի անցկացումն անօրինական հայտարարելու շուրջ բանաձևի օգտին:
Այս մասին «Ռոյթերս» գործակալությանը տեղեկացրել են ՄԱԿ-ի դիվանագետները՝ իրենց անվան գաղտնիությունը պահպանելու պայմանով: Դիվանագետների համաձայն, Ռուսաստանի կողմից ճնշումների ենթարկվել են Մոլդովան, Ղրղըզստանն ու Տաջիկստանը, ինչպես նաև Աֆրիկայի մի շարք պետություններ: ՄԱԿ-ի դիվանագետները տեղեկացրել են, որ Ռուսաստանը որևէ հստակ սպառնալիքներ չի հնչեցրել, սակայն պարզ էր, որ քվեարկության ընթացքում Ռուսաստանի դիրքորոշմանը դեմ քվեարկելու դեպքում վերջինս պատրաստ էր իր տարածքից վտարել աշխատանքային միգրանտներին, դադարեցնել բնական գազի առաքումը կամ առևտրային պատժամիջոցներ սահմանել:
Արձագանքելով Ռուսաստանի կողմից ՄԱԿ-ի Գլխավոր ասամբլեայում անցկացված քվեարկության մասնակիցներին սպառնալու մասին տեղեկությունների՝ ՄԱԿ-ում Ռուսաստանի ներկայացուցչության աշխատողներից մեկն ասել է, թե «մենք երբեք չենք սպառնում որևէ մեկին: Մենք պարզապես բացատրում ենք իրավիճակը»: ՄԱԿ-ի Գլխավոր ասամբլեան հինգշաբթի օրն էր հավանության արժանացրել Ուկրաինայի տարածքային ամբողջականությունը վերահաստատող և Ղրիմում անցկացված՝ Ռուսաստանի կողմից թերակղզու բռնակցման պատճառը դարձած հանրաքվեն անօրինական ճանաչող բանաձևը:
Արմեն ՀՈՎՀԱՆՆԻՍՅԱՆ
Կարդացեք նաև
Հրապարակումն ամբողջությամբ կարող եք կարդալ սկզբնաղբյուր կայքում:
