Առատ, թաց ձյունը երթեւեկությունը վտանգավոր է դարձրել
Մարտի 30-ի առավոտյան Նոյեմբերյանի ավտոկայարանում, տեղացող առատ ձյան ներքո Ոսկեվան գյուղից եկած պատանին մեկ կապը 300 դրամով սինդրիկ էր վաճառում: Նոյեմբերյան-Երեւան երթուղային միկրոավտոբուսը ճանապարհի վտանգավորության եւ ուղեւորների սակավության պատճառով առավոտյան երթուղի դուրս չեկավ: Նոյեմբերյանի «Լեւոն-երկրորդ» ՍՊԸ-ի եւ Իջեւանի ճանապարհաշինական ընկերության գրեյդերները ճանապարհից քերում էին ձյունը, բանվորները բեռնատարներից աղ էին շաղ տալիս: «Իջեւանի ՃՇՇ» ՓԲԸ տնօրեն Արծրունի Ղալումյանն ասաց, որ իրենց ընկերության տեխնիկան աշխատում է Ոսկեպար-Կիրանց, լեռնային տեղանքով ձգվող շրջանցիկ ուղին, Բերդի տարածաշրջան տանող ճանապարհը, Իջեւան-Դիլիջան հատվածը ձյան շերտից մաքրելու, ճանապարհները երթեւեկության համար բաց պահելու համար:
Իջեւան-Դիլիջան ճանապարհին թաց ձյունը ճանապարհը դարձրել է շատ սահուն: Այդ հատվածում ձյան ծանրության տակ ծառեր ու ծառերի ճյուղեր էին կոտրվել: «Աղթամար» ռեստորանի հարեւանությամբ, Սեւան-Երեւան մայրուղու աջ հատվածը կեսօրվա դրությամբ ձյունից չէր մաքրվել, որի պատճառով մեքենաների հատակը դիպչում էր ձյան հաստ շերտին, խանգարում մեքենաների շարժին, մի քանի մեքենաների պլաստմասե դետալներ կոտրված ընկած էին ճանապարհին:
Սեւանի մայրուղում պետավտոտեսուչներն իրենց մեքենայից ճոպան հանելով` օգնում էին ճանապարհի եզրի ձյան մեջ խրված մեքենային ճանապարհ դուրս գալու:
Կարդացեք նաև
Ոսկան ՍԱՐԳՍՅԱՆ
