Ապրիլի 3-13-ը Թել Ավիվում կայանալու են ծանրամարտի Եվրոպայի տղամարդկանց 93-րդ եւ կանանց 27-րդ առաջնությունները:
Հայաստանի տղամարդկանց եւ կանանց հավաքականներն այս օրերին ուսումնամարզական հավաք են անցկացնում Աբովյան քաղաքում: Aravot.am-ը հավաքականների գլխավոր մարզիչներից հետաքրքրվեց, թե ովքե՞ր են Իսրայելում մրցահարթակ մտնելու եւ ի՞նչ խնդիրներ են դրված ծանրորդների առջեւ:
Կանանց հավաքականի գլխավոր մարզիչ Արտաշես Ներսիսյանը տեղեկացրեց, որ Թել Ավիվ մեկնելու են երեք մարզուհիներ՝ Էլեն Գրիգորյանը՝ 48 կգ քաշային կարգ, Աննա Գովելյանը՝ 53 կգ եւ Հռիփսիմե Խուրշուդյանը՝ +75 կգ: Իսկ տղամարդկանց հավաքականի գլխավոր մարզիչ Պողոս Պողոսյանը որոշել է մրցավայր գործուղել Սմբատ Մարգարյանին՝ 56 կգ, Վանիկ Ավետիսյանին՝ 69, 77 կգ քաշայիններ Առաքել Միրզոյանին եւ Տիգրան Գեւորգի Մարտիրոսյանին, Աղասի Աղասյանին՝ 85 կգ եւ +105 կգ քաշայիններ Ռուբեն Ալեքսանյանին ու Հայկ Հակոբյանին:
Երկու մարզիչներն էլ ասացին, որ այս անգամ ծանրորդների առջեւ մեդալների համար պայքարելու առաջադրանք դրված չէ: Մարզիկները բավականին երկար ժամանակ լուրջ մրցումների չեն մասնակցել, ուստի կարեւորվել է մրցահարթակը, ծանրաձողն ու հանդիսականի ներկայությունը զգալը: Եվ միայն դրանից հետո արդեն ամենայն լրջությամբ կսկսեն նախապատրաստվել աշխարհի առաջնությանը, որտեղ խաղարկվելու են օլիմպիական խաղերի վարկանիշային միավորներ:
Կարդացեք նաև
Աշոտ ՀԱԿՈԲՅԱՆ
