Կենտրոն եւ Նորք Մարաշ վարչական շրջանների ընդհանուր իրավասության դատարանն այսօր մերժեց Գորիսի նախկին քաղաքապետ Սամվել Հարությունյանի հայցն ընդդեմ ՀՔԾ-ի եւ գլխավոր դատախազության:
Հիշեցնենք, որ պարոն Հարությունյանը դատարանում վիճարկում էր նշված կառույցների անգործությունը՝ Սյունիքի նախկին մարզպետ Սուրիկ Խաչատրյանի ու նրա մերձավորների կողմից մի շարք հանցագործությունների մասին իր հրապարակումների հիման վրա քրեական գործ չհարուցելու վերաբերյալ: Պարոն Հարությունյանը պահանջել էր դատարանից՝ պարտավորեցնել ՀՔԾ-ին եւ գլխավոր դատախազությանը քրեական գործ հարուցել իր հրապարակումների հիման վրա:
«Դատարանը գտավ, որ ՀՔԾ պետ Վահրամ Շահինյանն ու գլխավոր դատախազ Գեւորգ Կոստանյանը իբրեւ թե անգործություն չեն դրսեւորել, իմ իրավունքները չեն անտեսել ու մերժեց մեր բողոքը»,- ասաց պարոն Հարությունյանը:
Դատարանի 24 էջանոց մերժման որոշումը, ըստ պարոն Հարությունյանի, չհիմնավորված էր. «Այդ 24 էջից մոտավորապես 20 էջը իմ բողոքն էր, 3 էջը ՀՔԾ –ից ինձ ուղարկված գրություններն էին եւ ընդամենը մեկ էջի սահմաններում առանց որեւէ հիմնավորման որոշում էր հրապարակվել: Դատարանն այսօր եւս մեկ անգամ ապացուցեց, որ Հայաստանում արդարադատություն գոյություն չունի, առավել եւս այս բիրտ ռեժիմի կարկառուն դեմքերի կողմից կատարված հանցագործությունների պարագայում: Դատավոր Գայանե Կարախանյանը համալրեց տխրահռչակ Լիսկայի կատարած հանցանքների նկատմամբ մինչ այժմ ավելի քան 23 տարի Հայաստանի իրավապահ համակարգի հանցավոր անգործություն դրսեւորածների շարքերը: Եւ հեռու չէ այն օրը, որ բոլոր նրանք, որոնք դրսեւորել են հանցավոր անգործություն Լիսկայի հետ միասին կանգնելու են հայոց արդարադատության առջեւ»:
Կարդացեք նաև
Գորիսի նախկին քաղաքապետը պատրաստվում է բողոքարկել դատարանի որոշումը Վերաքննիչ քրեական եւ Վճռաբեկ դատարաններում. «Եւ իմ առջեւ բացվելու է մարդու իրավունքների եվրոպական դատարան դիմելու հնարավորությունը, եւ ես օգտվելու եմ: Եվ վայ նրանց, երբ իմ կողմից այդ փաստերը կդրվեն եվրոպական դատարանի սեղանին»:
Արփինե ՍԻՄՈՆՅԱՆ
