«Այս դահլիճում երիտասարդ, բայց ինչպես ինքը իր քաղաքական կարիերայում արտահայտվել էր՝ վաղ տարիքում իր քաղաքական կուսությունը կորցրած նախարարը, ի դեպ, պարոն Աբրահամյան, խնդրում եմ ինձ կոչ չանեք կոռեկտության, որովհետեւ ես ընդամենը հիշեցրեցի իր իսկ հրապարակային բառերը: Այդ նախարարը մի ամբողջ օր կոչ էր անում ընդունել առաջարկված նախագծերը՝ որպես բարեփոխում՝ կրթության բնագավառում»,- այսօր ԿԳ նախարար Արմեն Աշոտյանի մասին այսպես արտահայտվեց ՀԱԿ խմբակցության ղեկավար Լեւոն Զուրաբյանն ԱԺ-ում «Կրթության մասին», «Նախնական մասնագիտական (արհեստագործական) եւ միջին մասնագիտական կրթության մասին», «Բարձրագույն եւ հետբուհական մասնագիտական կրթության մասին» օրենսդրական փաթեթի քննարկման ժամանակ:
Լեւոն Զուրաբյանի խոսքերով՝ «Ամեն ինչ չափ ու սահման ունի: Դուք երբեք որեւէ բարեփոխում, գործողություն չեք արել, մեկ քայլ չեք արել՝ գիտության եւ կրթության բնագավառի զարգացման համար: Ձեր որեւէ քայլ, բարեփոխում, հրաման կամ հեռախոսազանգ ուղղված է եղել մեկ նպատակի իրագործմանը՝ ուսումնական հաստատություններում ՀՀԿ-ի տոտալ վերահսկողության նպատակին»:
Լեւոն Զուրաբյանը նաեւ դիտողություն արեց, որ օրենսդրական փաթեթի հիմնավորումը «շատ փնթի» է. «Այնքան փնթի եք գտնվել, որ ինքներդ էլ չեք նկատել, որ ներկայացված փաստերով ակամա մատնել եք փոփոխությունների իրական նպատակը: Բոլոր երեք հիմնավորումների մեջ կա այս նախադասությունը՝ ակադեմիական ազատության եւ ինքնակառավարման իրավունքի պայմաններում շատ հաճախ գործադիր օղակը դժվարանում է արձագանքել կամ ինքնուրույն հաղթահարել աշխատաշուկայի արագ փոփոխություններին: Ահա որտեղ է թաղված շունը, կամ այն մեծագույն չարիքը, որի դեմ պատերազմ է հայտարարել ԿԳ նախարարությունը: Դա է ակադեմիական ազատությունը եւ ինքնակառավարման իրավունքը: ՀՀԿ-ականները հասկանում են, որ հենց ազատությունն ու ինքնակառավարումն են գլխավոր խոչընդոտը՝ տոտալ վերահսկողության հաստատման ճանապարհին»:
Նա նաեւ ասաց, որ երկրի 1400 դպրոցների տնօրենների մոտ 80 տոկոսը՝ 1100-ը, ՀՀԿ-ական են: Լեւոն Զուրաբյանը հիշեցրեց, որ Արմեն Աշոտյանը հեռացրել է ռեկտորի պաշտոնից իրեն անհնազանդ Սուրեն Զոլյանին, որ բոլոր ռեկտորներին հանրապետականացնում է. «Այն ժամանակ, երբ ԲՀԿ-ն իշխող կոալիցիայի անդամ էր, «Գագիկ Ծառուկյան» հիմնադրամին թույլ էր տրվում բարեգործություն անել՝ վճարել կրթաթոշակները եւ ուսանողների ուղեւորավարձը: Երբ ԲՀԿ-ն ընդդիմություն դարձավ այս իշխանություններին, դա անմիջապես խոչընդոտվեց, եւ այդ գործառույթը տրվեց մի մեծահարուստի, որն այնքան հեռու է կրթությունից, որքան Աշոտյանը՝ բալետից: Բայց նա ունի հավատարմություն ՀՀԿ-ի առաջնորդին»:
Կարդացեք նաև
Հռիփսիմե ՋԵԲԵՋՅԱՆ
ԲՀԿ-ին դուր գալու համար ինչքան է իջնում էս մարդը: ԲՀԿ-ն ասում է ընդիմություն չենք ինքը ասում է ընդիմություն է:
Ծառուկյանը և կրթությունն էլ մոտ չեն, այդ ինչու էս մեկը տեսնում իսկ մյուսը ոչ, թե էլի ԲՀԿ գովերգելու գործառույթն էս իրականացնում…