Ճանապարհատրանսպորտային խախտումների համար կիրառվող տուգանքների հարցով աշխատանքային խումբ կստեղծվի: Այսօր Կառավարության նիստի սկզբում ասաց վարչապետ Տիգրան Սարգսյանը: Նրա խոսքերով, ճանապարհատրանսպորտային խախտումների տուգանքների խնդիրը վարորդների շրջանում դժգոհության նոր առիթ է դարձել, այդ պատճառով, պետք է պարզել, թե որքանո՞վ են այդ տուգանքներն արդարացի, օրենսդրությունում կա՞ն բացեր, ինչպիսի՞ն է միջազգային պրակտիկան եւ արդյոք միջազգային պրակտիկայից կարո՞ղ ենք այնպիսի մեխանիզմներ ընտրել Հայաստանի համար, որ մեր քաղաքացիներն ընդունեն՝ օրենսդրությունն ու տուգանքները արդար են:
Վարչապետը կառավարության աշխատակազմի ղեկավար Վաչե Գաբրիելյանին հանձնարարեց որոշման տեքստ պատրաստել, որպեսզի արդարադատության նախարարության գլխավորությամբ ստեղծվի աշխատանքային խումբ, որում կընդգրկվեն հասարակական կազմակերպությունների ներկայացուցիչներ եւ բոլոր այն շահագրգիռ մարմինները, որոնք ցանկություն կունենան:
Արդարադատության նախարար Հրայր Թովմասյանը նշեց, որ մեկ-երկու ամիսը բավարար կլինի՝ պարզելու, թե ինչ ուղղությամբ են ընթանալու աշխատանքային խմբի աշխատանքները, իսկ եթե օրենսդրական փոփոխության կարիք լինի, եւս մեկ ամիս կպահանջվի:
Լուսինե ԲՈՒԴԱՂՅԱՆ
