«Պարոն վարչապետ, ի՞նչն է պատճառը, որ միջազգային կառույցներից ցածր տոկոսներով վարկեր ստանալով, մենք այն գյուղացուն ենք հասցնում մինչեւ 27-30 տոկոսով: Ի՞նչն է պատճառը նման բարձր տոկոսների»,- այսօր ԱԺ-ում կառավարության հետ հարցուպատասխանի ժամանակ ԲՀԿ խմբակցության պատգամավոր Լյովա Խաչատրյանն այսպիսի հարց ուղղեց Տիգրան Սարգսյանին:
Հարցին պատասխանեց էկոնոմիկայի նախարար Վահրամ Ավանեսյանը: Նրա խոսքերով՝ բանկային տոկոսադրույքները բավականաչափ բարձր են եւ դա չի վերաբերում միայն գյուղատնտեսությանը. «Ունենք ՓՄՁ-ների վարկավորման տոկոսադրույքների հետ կապված խնդիրներ էլ: ՀՀ-ում այսօր այնպիսի իրավիճակ է, որ վերաֆինանսավորման տոկոսադրույքն է այն հիմնական գործիքը, որն ազդում է վարկային տոկոսների վրա: ԿԲ-ի միակ խնդիրը ինֆլյացիան է, տոկոսադրույքը սահմանվում է՝ ելնելով սպառողական գների ինդեքսից: ՀՀ-ում դեռեւս կորպորատիվ կառավարման խնդիրներ մենք ունենք: Կորպորատիվացման տեսանկյունից մենք շատ անելիքներ ունենք»:
Լյովա Խաչատրյանն ապշել էր նախարարի այս «հանրամատչելի» պատասխանից. «Եթե ձեր պատասխանը գյուղացիք լսեին, հետաքրքիր է, թե ինչ եզրահանգում կանեին»:
Կարդացեք նաև
Լյովա Խաչատրյանը բորբոքվեց. «Գյուղացիների մեծ մասը տները կորցրել է: Եթե մեկը վարկ էր վերցրել, ռիսկ էլ չկա՝ 98 տոկոս վերադարձելիություն: Փոխկապակցված-կապակցված տարբեր հորինված բաներ, ամբողջ ազգուտակով, գյուղով ընկել են վարկերի տակ: Սա վաշխառուություն է: 3-4 տոկոսով վերցնում եք, 25 տոկոսով տալիս, էդ ի՞նչ եք անում: Դիտավորյա՞լ եք անում, որ մարդիկ հանցագո՞րծ դառնան: Մարդ ու կնիկ իրար վրա են գցում պարտքը, բաժանվում իրարից: Արդեն ընտանիք են քայքայում այդ վարկերը»:
Հռիփսիմե ՋԵԲԵՋՅԱՆ
