ՍԴՀԿ փոխատենապետ Վազգեն Մեսրոպյանի տեղեկություններով, այսօր առավոտյան Սիրիայի հայաբնակ տարածքում՝ Քեսաբում, զինյալ խմբավորումները մտել են տեղահանված հայերի տներ, այրում են հայ ընտանիքների տները, փշրում, ջարդում:
«Քեսաբը դատարկված է, բանակը հետ է քաշվել, որ հետագայում իմանան՝ ինչ անեն: Չորս կողմից անսպասելի ու միանգամից են ներխուժել: Լուսավորչական եկեղեցին են նաեւ ներխուժել այսօր, այն դարձրել են մզկիթ, իսկ տեղահանված քեսաբցիների տներից ունեցվածքը թուրքերը տեղափոխում են Թուրքիա»,- այսօր «Հայնյուզ» ակումբում պատմեց պարոն Մեսրոպյանը: Նա Քեսաբի ավերածություններում տեսնում է Թուրքիայի վարչապետ Ռեջեփ Թայիփ Էդողանի ձեռքը.«Թուրքն իր անելիքն անում է, երեւի ոճրագործ, ֆաշիստ, նացիստ Էրդողանը իր նպատակներ է հետապնդում: Մեկ շաբաթվա ընթացքում բացեցին սահմանները, թույլ տվեցին ահաբեկիչներին ներս մտնել, որոնց մի մասը թուրքմեններ էին, որոնք ապրել են Քեսաբում եւ ճանապարհները լավ գիտեն»:
Նրա խոսքով, ինչքան մոտենում ենք ցեղասպանության 100 ամյակին, այնքան թուրքը իր «ոխակալ քայլերին է դիմում եւ կրկին տեղահանում հայերին: Ինչքան կարելի է : Հայաստանի կառավարությունից եւ նախագահից պահանջում ենք՝ ոչ միայն խոսքերով դիմեն ԵԽ, միջազգային կառույցներ, պետք է ճշգրիտ քայլ անել»:
Արեւելագետ Արմեն Պետրոսյանն էլ նկատել է, որ սիրիական հակամարտության մարտավարության փոփոխություն. «Մասնավորապես, հակակառավարական ուժերը փորձում են երկրի ներսում ուժերի հավասարակշռությունը փոխել դեպի իրենց կողմից հովանավորվող կողմը: Ակտիվացում ենք տեսնում երկրի հյուսիս արեւելյան հատվածում՝ Թուրքիայի ներգրավմամբ»:
Արմեն Պետրոսյանի համոզմամբ, մարտավարության փոփոխությամբ նախատեսում են առաջիկա ամիսներին հզոր գրոհ սկսել Դամասկոսի վրա:
Արփինե ՍԻՄՈՆՅԱՆ
Կարդացեք նաև
