«Քրեակատարողական հիմնարկներում պատիժը կրող դատապարտյալները հանրության լիարժեք անդամներ են եւ չպետք է անմասն մնան արտաքին աշխարհին եւ մշակութային արժեքներին հաղորդակցվելուց»: Այս գաղափարին իր հավատարմությունը լրագրող-հաղորդավար Մանան Հովակիմյանը (լուսանկարում) հավաստում է պարբերաբար՝ կազմակերպելով համերգներ հանրապետության քրեակատարողական հիմնարկներում: 2013թ. օգոստոսին «Կոշ» քրեակատարողական հիմնարկում կայացավ առաջին համերգը՝ հայտնի երգիչ-երգչուհիներ Ալիկ Գյունաշյանի, Գայանե Սերոբյանի, հարմոնահար Գագիկ Ստեփանյանի, դհոլահար Վարդան Նազարյանի եւ այլ երաժիշտների մասնակցությամբ, ինչը մեծ ուրախություն եւ ոգեւորություն պարգեւեց դատապարտյալներին:
Հիմնվելով առաջին հաջողված փորձի վրա՝ որոշվեց համերգաշարը դարձնել շարունակական, ինչը դրական արձագանք գտավ ՀՀ քրեակատարողական ծառայությունում: Եվ քանի որ այս օրերին նշվում է կանանց միամսյակը, համերգը կազմակերպվեց «Աբովյան» քրեակատարողական հիմնարկում, ուր իրենց պատիժն են կրում կին դատապարտյալները: Մարտի 21-ին կայացած համերգին իրենց մասնակցությունը բերեցին Վարդան Նազարյանի եւ Հովհաննես Գալոյանի գործիքային համույթը, ՀՀ վաստակավոր արտիստ Արսեն Գրիգորյանը, երգիչներ Խաչիկ Խաչատրյանը, Մանուկ Աղազարյանը, Ալեքսանդր Պոլոյանը, երգիչ-երգահան Հայկ Գեւորգյանը: Դատապարտյալների արձագանքը ոգեւորիչ էր, ինչի ապացույցն է այն, որ համերգը պլանավորված 1,5 ժամվա փոխարեն տեւեց ավելի քան 3,5 ժամ:
«Շատ կարեւոր է ուշադրության կենտրոնում պահել հանրությունից մեկուսացված մարդկանց: Նրանց պետք է հիշեցնել, որ անկախ որեւէ հանգամանքից, իրենց սպասում են: Դատապարտյալներից պետք է ոչ թե խուսափել, այլ նմանատիպ միջոցառումների օգնությամբ ստեղծել անմիջական կապ», – գտնում է Մանան Հովակիմյանը: Իսկ դհոլահար, գործիքային խմբի ղեկավար Վարդան Նազարյանի կարծիքով, համերգի հանդիսատեսը շատ ջերմ էր ու անմիջական: «Մենք միշտ պատրաստ ենք մեր կատարումներով ուրախացնելու մեր հանդիսատեսին՝ անկախ նրանց կարգավիճակից եւ գտնվելու վայրից», – ասաց նա:
Առաջիկայում համերգաշարի մասնակիցները կհյուրընկալվեն նաեւ այլ քրեակատարողական հիմնարկներում:
Կարդացեք նաև
Սեփ. լր.
«Առավոտ» օրաթերթ
