Այս օրերին միջազգային հանրության ուշադրության կենտրոնում է գտնվում Սիրիայի հայաբնակ բնակավայրի` Քեսաբի հարցը: Հիշեցնենք, որ մարտի 21-ի առավոտյան զինյալ խմբավորումների կողմից հարձակման է ենթարկվել Սիրիայի հայաբնակ Քեսաբ բնակավայրը: Հարձակվողները ներխուժել են Թուրքիայի տարածքից: Հարձակման թիրախում սկզբնապես հայտնվել է Քեսաբին մաս կազմող Սեւ աղբյուր գյուղը, որի շրջակա բարձունքները գրավվել են: Նշենք նաև, որ ՄԱԿ-ում Սիրիայի մշտական ներկայացուցիչ Բաշար Ալ-Ջաֆարին երկու նամակ է ուղարկել ՄԱԿ գլխավոր քարտուղարին և ԱԽ-ի ղեկավարին, որում Թուրքիայի կառավարությանը կրկին մեղադրել է ահաբեկիչներին և «Ալ-Կաիդայի» հետ առնչություն ունեցող խմբավորումներին աջակցելու մեջ:
Փաստերի համադրության արդյունքում պարզ է դառնում, որ Թուրքիան ունի հեռահար նկրտումներ`թուլացնել հայկական համայնքը, մանավանդ, որ Քեսաբը հայաբնակ այն բնակավայրերից է, որն ունի պատմական հզոր ավանդույթներ:
Aravot.am-ը արաբագետ Արաքս Փաշայանից հետաքրքրվեց` Քեսաբի վրա հարձակմամբ Թուրքիան ի՞նչ հեռահար նպատակներ է հետապնդում: Արաբագետը պատասխանեց. «Մեզ համար ամենանուրբ կետը, ամենացավոտ հարցերից մեկը Քեսաբն էր, որը մինչև վերջերս հնարավոր էր լինում զերծ պահել ընդդիմադիր զինյալներից: Բայց հիմա գրեթե ամբողջությամբ բնակավայրը դատարկված է, դրանից ավելի էլ ի՞նչ մարտահրավեր պիտի լինի: Թուրքիայի գործողություններն ուղղված են նաև հայկական համայնքը թուլացնելու ծրագրի իրագործմանը: Ինչ-որ իմաստով դա Թուրքիային հաջողվեց, քանի որ մեծ վնաս հասցրեց Սիրիայում մեր մայր գաղութին` Հալեպին: Այդ առումով Թուրքիան շահած դուրս եկավ սիրիական գործընթացից` թուլացնելով Սիրիան` որպես պետություն»:
Արաբագետը շեշտեց , որ Քեսաբը «որպես Կիլիկյան Հայաստանի մի բեկոր մնում էր, ու հիմա Քեսաբի վիճակը բոլորին պիտի մտահոգի»:
Կարդացեք նաև
Հետաքրքրվեցինք` համարժե՞ք էր միջազգային հանրության արձագանքը: Արաքս Փաշայանը պատասխանեց. «Անգամ մեր իշխանությունները, մեր հասարակությունը չեն արձագանքում, ինչո՞ւ պիտի միջազգային հանրությունը արձագանքի: Մեր հասարակության շատ ներկայացուցիչներ անգամ Քեսաբի տեղը քարտեզի վրա չգիտեն, մինչդեռ սիրահայերը երկրաշարժի և արցախյան շարժման ժամանակ Հայաստանի կողքին են եղել: Ուստի մենք` որպես հասարակություն, բացթողումներ ունենք ազգային խնդիրների հեռանկար գիտակցման առումով»:
Արաքս Փաշայանը տեղեկացրեց, որ Քեսաբն այժմ գրավված է զինյալների, ընդդիմադիր իսլամիստների կողմից, բնակչությունը տարհանված է, իսլամիստները ապրում են հայերի տներում և ենթադրվում է, որ նաև կողոպտում են, ավերում: Մեր հարցին` կորցնելով Քեսաբը, ի՞նչ է կորցնում հայությունը, Արաքս Փաշայանը պատասխանեց. «Մենք շատ բան ենք կորցնում. նախ ամբողջ հայության ճակատագիրն է մնում անորոշ, մենք կորցնում ենք պատմական Կիլիկյան Հայաստանի վերջին շրջանը: Քեսաբը հայաշատ բնակավայր էր, մի քանի գյուղերից կազմված գյուղաքաղաք, համապարփակ հայություն ունեցող բնակավայր, որտեղ մարդիկ զբաղվում էին գյուղատնտեսությամբ և այլ գործերով: Այստեղ անցկացվում էին սկաուտական բանակումներ, հայ առաքելական և հայ ավետարանական եկեղեցիներն էին գործում, այստեղ հայերն ապրում էին հայկական ավանդույթներով»:
Aravot.am-ը ԱԳՆ մամուլի խոսնակ Տիգրան Բալայանից հետաքրքրվեց` քեսաբահայերին աջակցելու հարցում ԱԳՆ-ն ի՞նչ քայլեր է ձեռնարկում: Պարոն Բալայանը ի պատասխան նշեց, որ «քայլերը հրապարակման ենթակա չեն»:
Տաթև ՀԱՐՈՒԹՅՈՒՆՅԱՆ
ДА! Цинизм “международного сообщества” поражает, когда спокойно смотрят на тысячами гибнувших детей и оооочень беспокоятся, когда ” находят белокурого ребенка в цыганском таборе”(((((. И почему, когда говорят о Сирии, обсуждают только вывоз хим. оружия? И кто финансирует этих бандитов? Турция еще не знает, что следующие 100 лет будет отвечать за сегодняшнее зверства, точно так, как уже 100 лет отвечает за Геноцид.