Փոխադրողների միության նախագահ Հրանտ Եղիազարյանը եւ մի քանի ուղեւորափոխադրող ընկերությունների նախագահներ այսօր լրագրողների հետ հանդիպման ժամանակ հայտնեցին, որ կրկին դիմել են կառավարությանը՝ տրանսպորտի 100 դրամ ուղեվարձը բարձրացնելու պահանջով:
Միության նախագահի խոսքերով՝ 100 դրամ ուղեվարձի պատճառով կան ընկերություններ, որոնք լուծարվել են, մի քանիսն էլ սնանկության գործընթացի մեջ են. «Բոլոր ընկերությունները մեծ վնասներ են կրում, քանի որ 100 դրամով ուղեւորափոխադրում իրականացնելը անհնար է»:
Հրանտ Եղիազարյանը հայտնեց, որ նամակով դիմել են ՀՀ նախագահին, վարչապետին եւ քաղաքապետին. «Կարծես թե մեզ լսեցին եւ ապրիլի 4-ին գումարվելու է նիստ: Կարծում ենք, որ նիստի ժամանակ մեզ կասեն, թե ինչ գումար պետք է վճարեն քաղաքացիները՝ երթուղային տաքսի նստելիս»:
Միության նախագահը առաջարկում է, որպեսզի ուղեւորները 150 դրամ վճարեն, իսկ փոխադրողները դրանից ստանան 50 դրամ դոտացիա :
Կարդացեք նաև
Նա պնդում է, որ ուղեվարձի բարձրացման համար դեռեւս 2008 թվականին էին դիմել կառավարությանը եւ առաջարկել, որ այն դառնա 150 դրամ. «Մենք արդեն 6 տարի է սպասում ենք, եւ այն դեռ չի թանկացել: Մարդիկ ներդրումներ են կատարել, մեծ միջոցներ է պահանջվել մեքենաներ ձեռք բերելու համար: Սակայն քայքայման եզրին են»:
Մանրամասն՝ տեսանյութում.
Փոխադրող ընկերությունների նախագահների պնդմամբ ՝ ամբողջ ձմեռ իրենք, վնասներ կրելով, աշխատել են: Սակայն արդեն այնպիսի վտանգի տակ են, որ երթուղիները գնալով չեն սպասարկում. « 23 երթուղի արդեն չեն սպասարկվում ընդհանրապես, եւ վերջերս այդ շարքին եւս 7 երթուղի է ավելացել : Ընկերությունները իրենց երթուղիների մի մասից հրաժարվել են, քանի որ չեն կարողանում այդքան մեքենա դուրս բերել»:
Ուղեւորափոխադրող ընկերություններից մեկի նախագահ Լյուդվիգ Պողոսյանը հանդիպման ժամանակ արտահայտեց իր վրդովմունքը՝ ասելով որ իր ողջ ունեցվածքը գրավադրել է, որպեսզի տրանսպորտի միջոցներ ներմուծի եւ աշխատացնի իր երթուղին: Վառելիքի գումարը նույնպես չի բավականացնում:
Մանրամասն՝ տեսանյութում.
Էլյա ՀՈՎՀԱՆՆԻՍՅԱՆ
