Այսօր Խանտի-Մանսիյսկում կայացավ շախմատի աշխարհի չեմպիոնի կոչման համար հավակնորդների մրցաշարի վեցերորդ տուրը:
Հայաստանի առաջատար գրոսմայստեր Լեւոն Արոնյանը, որ սպիտակներով խաղում էր ետնապահ, ռուսաստանցի Դմիտրի Անդրեյկինի հետ, մրցաշարային աղյուսակում միանձնյա առաջատարին` աշխարհի նախկին չեմպիոն Վիշվանաթան Անանդին, միավորներով հավասարվելու լավ հնարավորություն ուներ: Մանավանդ, որ հնդիկ գրոսմայստերը արդեն ոչ-ոքի էր արել Սերգեյ Կարյակինի հետ: Սակայն Լեւոնը 48-րդ քայլում բաժանեց միավորը եւ նրա ու Անանդի միջեւ կես միավորի տարբերությունը պահպանվեց: Ավելին, մյուս պարտիաներում էլ գրանցվել էին այնպիսի արդյունքներ, որոնք հայ գրոսմայստերին հիմնական խմբից մեկ միավոր պոկվելու հնարավորություն էին ընձեռում: Հիմնական մրցակիցը` Վլադիմիր Կրամնիկը, պարտվեց Վեսելին Տոպալովին, անհաջող մեկնարկած Շախրիյար Մամեդյարովը Խանտի-Մանսիյսկում երկրորդ անընդմեջ հաղթանակը տարավ, այս անգամ` Պյոտր Սվիդլերի նկատմամբ: Ինչեւէ, Արոնյանը 3,5 միավորով մնաց մաքուր երկրորդ հորիզոնականում: Վաղը մասնակիցների հանգստյան երկրորդ օրն է: Մարտի 21-ին` յոթերորդ տուրում, Լեւոն Արոնյանի մրցակիցը Սերգեյ Կարյակինն է: Իսկ վեցերորդ տուրից հետո մրցաշարային աղյուսակն այսպիսի տեսք ստացավ:
1. Վիշվանաթան Անանդ` 4,0 միավոր
2. Լեւոն Արոնյան` 3,5
Կարդացեք նաև
3. Վլադիմիր Կրամնիկ` 3,0
4. Շախրիյար Մամեդյարով` 3,0
5. Պյոտր Սվիդլեր` 3,0
6. Վեսելին Տոպալով` 3,0
7. Սերգեյ Կարյակին` 2,5
8. Դմիտրի Անդրեյկին` 2,0
Աշոտ ՀԱԿՈԲՅԱՆ
Լուսանկարը` bilbaomastersfinal.com-ի
