«Իրատեսական եմ համարում երեքից հինգ տարի»,-այսօր «Փաստարկ» ակումբում պատասխանելով հարցին, թե երբ կզգանք Մաքսային միության անդամակցության դրական անդրադարձը, այսպիսի կարծիք հայտնեց տնտեսագետ Վարդան Բոստանջյանը: Նա վստահեցրեց, որ Մաքսային միության անդամակցությունը ՀՀ տնտեսության վրա դրական ազդեցություն կունենա:
Ի հակադրություն պարոն Բոստանջյանի դիտարկումների՝ հիշեցրինք ՀՀ նախկին արտգործնախարար Ալեքսանդր Արզումանյանի այն դիտարկումները, թե «Մեր տնտեսությունն ամբողջապես ռուսաստանյան տնտեսությունից է կախված, և դա տնտեսապես լուրջ ազդեցություն է ունենալու Հայաստանի վրա. կլինի ինֆլյացիա, գնաճ»: Այս առիթով պարոն Բոստանջյանը բորբոքվեց. «Հասկանում եմ, թե ով որտե՞ղ ու ինչո՞ւ է ծառայում: Նման ծառայություններից ելնելով՝ կոչված են որոշակի սուբյեկտներ կամ ֆիզիկական անձեր ավելի վառ գույներով նկարագրելու այն, ինչ որ չկա և հնարավոր է չլինի: Մյուս կողմից էլ գնաճը հո ամենակարևո՞րը չէ»: Այնուհետև Վարդան Բոստանջյանը շեշտեց ՀՀ անվտանգության հարցն ու ասաց. «Հանգամանքների բերումով տասնամյակներ շարունակ գտնվել ենք անվտանգության այն համակարգում, որ այսօր ենք, և երբ առաջացավ Եվրաասոցացման և Մաքսային միության անդամակցության հարցը, սա երկընտրանք չէր»: Պարոն Բոստանջյանը պնդեց, թե «Եվրոպան նստած շնչահեղձ» չի սպասում Հայաստանին ու մանրամասնեց. «ՀՀ-ում գոյություն ունեցած արտադրական կուլտուրայի պայմաններում մենք մեր արտադրածը կարող ենք իրացնել այնպիսի անհատակ շուկաներում, ինչպիսիք են Մաքսային միությունն ու Ռուսաստանը»:
Հարցին՝ Ռուսաստանի դեմ իրականացված պատժամիջոցները արդյոք բացասաբար չե՞ն անդրադառնա ՀՀ տնտեսության վրա, պարոն Բոստանջյանն այսպես արձագանքեց. «Հանգիստ ապրեք, պատժամիջոցներ չեն լինի, որ դեռ մի բան էլ ազդեն ՀՀ տնտեսության վրա»:
Անդրադառնալով Ղրիմի հարցում ՀՀ-ի դիրքորոշմանը՝ պարոն Բոստանջյանն ասաց. «Մենք, լինելով փոքր երկիր, չափազանց զգույշ պիտի լինենք այս հարցում: Ավելորդ շարժումներ պետք չեն, որ գերհզորների հարվածների տակ չհանգրվանենք»:
Լրագրողները հետաքրքրվեցին՝ եթե վարչապետը փոխվի, հնարավո՞ր է ՀՀ-ն հայտնվի դրախտում, պարոն Բոստանջյանն ասաց. «Միայն կառավարությամբ չէ պայմանավորված, իշխանությամբ է պայմանավորված, ու ելնելով քաղաքական ելևէջներից՝ կառավարության վրա ենք սուրը ուղղում: Բայց կառավարության մեղքի բաժինը դոմինանտ չէ»:
Կարդացեք նաև
Տաթև ՀԱՐՈՒԹՅՈՒՆՅԱՆ
