Աշխարհի առաջատար օպերային թատրոններում, բացի օպերային ու բալետային ներկայացումներից, ընդունված են ստեղծագործական խմբերի (նվագախումբ, երգչախումբ, բալետային խումբ) եւ մենակատարների համերգային ելույթները: Նման միջոցառումները նպատակ ունեն երաժշտասեր հանրությանը ներկայացնել մեծանուն կոմպոզիտորների, բացի խաղացանկում եղած երկերից, նաեւ համաշխարհային երաժշտական գրականության այլ ընտիր նմուշներ եւս: Հասկանալի պատճառով, որեւէ թատրոնի խաղացանկում չեն կարող ընդգրկված լինել, ասենք, Վերդիի բոլոր 26 օպերաները: Ալ. Սպենդիարյանի անվան օպերայի եւ բալետի ազգային ակադեմիական թատրոնը, որի խաղացանկում են «Աիդան», «Տրավիատան» եւ «Տրուբադուրը», օրինակ, 2011 եւ 2013 թվականներին ստեղծագործական խմբերի ու մենակատարների մասնակցությամբ հանդես է եկել «Վերդիանա» եւ Viva Verdi ծրագրերով: Երեկ Ազգային օպերային թատրոնում երեկո էր՝ դարձյալ «Վերդիանա» խորագրով, թատրոնի նվագախմբի, երգչախմբի եւ մենակատարների (Աննա Մնացականյան, Ինգա Կարապետյանց, Հայկ Տիգրանյան, Ալեքսեյ Ավետիսյան, Գեորգի Առաքելով) մատուցմամբ, դիրիժոր Հարություն Արզումանյանի ղեկավարությամբ: Համերգը հաջողված էր, որի ապացույցը յուրաքանչյուր համարից հետո հանդիսատեսի բրավոներն էին:
«Առավոտը» զրույցի հրավիրեց օպերային թատրոնի նորանշանակ գլխավոր խմբավար Ռադիկ Մելիքյանին, որի խոսքերով՝ «համերգն ինձ համար այս պաշտոնում առաջինն էր եւ կարծես հաշվետվություն լիներ: Երգչախմբի մասին խոսելիս, կուզեի առանձնացնել խմբավարներ Զոյա Կարապետյանի եւ Հրաչ Բորյանի աշխատանքը»: Ի պատասխան մեր հետաքրքրությանը՝ գլխավոր խմբավարը սեղմ ներկայացրեց իր անցած ստեղծագործական ուղին: Նա 1990-ականների սկզբից ֆիլհարմոնիկ նվագախմբի երգչախմբի խմբավար էր, աշխատել է Հարություն Թոփիկյանի եւ Ռոբերտ Մլքեյանի ղեկավարած կամերային երգչախմբերի հետ, հյուրախաղերով հանդես եկել Իտալիայում, Անգլիայում, Նորվեգիայում եւ այլն: 2004թ. հիմնել է «Սանկտուս» վոկալ անսամբլը, որը 2005թ. Գերմանիայում կայացած երգչախմբային արվեստի համաշխարհային մրցույթում «Անսամբլային արվեստ» անվանակարգում արժանացել է երկրորդ մրցանակի, ընդ որում՝ առաջին մրցանակ չի շնորհվել: «Սանկտուսի» հետ, եվրոպական երկրներից բացի, խմբավարը հայ երգչախմբային արվեստը ներկայացրել է նաեւ ԱՄՆ-ում, Կանադայում: 2010-ից Ռադիկ Մելիքյանը հանդիսացել է ՀՀ զինված ուժերի երգի եւ պարի անսամբլի երգչախմբի ղեկավար, մինչ այդ 4 տարի ղեկավարել է Նոր Ջուղայի (Իսպահան) Սուրբ Ամենափրկիչ վանքի «Կոմիտաս» երգչախումբը: Նոր պաշտոն ստանձնելու առիթով մեր զրուցակիցն ասաց, թե տեղեկացել է գլխավոր խմբավարի թափուր պաշտոնի մասին եւ ցանկություն հայտնել աշխատել հարուստ կենսագրություն ունեցող երգչախմբի հետ: Ընդ որում, 80 տարին բոլորած երգչախմբի հետ հիմնադրման օրվանից աշխատել է Ռոստովից հրավիրված խմբավար Նիկոլսկին, հետագայում այդ պաշտոնը վարել է Երեւանի կոնսերվատորիայի՝ նրա դասարանում սովորած Կարո Կարապետյանը, այնուհետեւ՝ Ռուբեն Այվազյանը եւ այլն: Ժամանակին երգչախմբի խորհրդատուներն էին Թաթուլ Ալթունյանը եւ Գրիգոր Սանդալջյանը: 1994-2013թթ. երգչախումբը ղեկավարել է Կարեն Սարգսյանը:
Ռեպլիկին՝ հավանաբար նախկինում մշտապես չի շփվել օպերային գրականության հետ, Ռադիկ Մելիքյանը հակադարձեց. «Տարբեր երգչախմբերի հետ աշխատանքի ընթացքում, անկասկած, ղեկավարել եմ օպերային գրականության գործեր»: Նկատեց, թե օպերային թատրոնի երգչախումբը ինչ-ինչ պատճառներով քիչ է անդրադարձել ակապելլա կատարումներին, փաստելով կայացած համերգում հնչած «Ռեքվիեմից» հատվածը եւ «Ավե Մարիան», որոնք ընդգծված ջերմ ընդունեց հանդիսատեսը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
Վերդին գրել է ոչ թե 40, այլ ընդհամենը 26 օպերա:
Հարգանքով՝
Հ. Պապյան
Շնորհակալ ենք, տիկին Պապյան: Ուղղումը կատարված է