Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը հետաձգեց Լիանա Ղազարյանի դեմ հարուցված քրեական գործով հրավիրված դատական նիստը: Մեղադրողը վատառողջ էր եւ դատարանին հայտնել էր, որ չի կարող ներկայանալ դատարան:
Լիանա Ղազարյանը եղել է «Էյ Էլ Ջի Թի» ՍՊ ընկերության տնօրեն: ՍՊԸ-ն գրանցված է եղել պետեկամուտների կոմիտեի Կենտրոնի հարկային տեսչությունում: Ընկերությունը զբաղվել է գովազդային ծառայությունների մատուցման վերավաճառքով, շահույթ հետապնդող ձեռնարկատիրական գործունեությամբ:
Մեղադրանքը պաշտպանող ՀՀ գլխավոր դատախազության սեփականության եւ տնտեսական գործունեության դեմ ուղղված հանցագործությունների գործերով վարչությունը մեղադրում է ՍՊԸ-ի տնօրենին, որ նա ստեղծել է կանխամտածված անվճարունակության հատկանիշներ, պետությանը պատճառել 4 մլն 616054 դրամի վնաս, ինչը նախատեսված է ՀՀ քրեական օրենսգրքի 193 հոդվածով:
Ի դեպ, ըստ գործի նյութերի, ընկերության գործունեությունը խափանվել է, քանի որ «Երկիր մեդիա» եւ «Արմենիա TV» հեռուստաընկերություններից տնօրենը ձեռք է բերել ընդհանուր 4 մլն 200 հազար դրամ գումարի չափով գովազդի տեղադրման ժամանակահատվածներ, սակայն պատվիրատուները հրաժարվել են գովազդի տեղադրումից, ինչի պատճառով նշված գումարը վերադարձնել հնարավոր չի եղել:
Կարդացեք նաև
Լիանա Ղազարյանի պաշտպանությունն իրականացնում է ճանաչված փաստաբան Հրանտ Գեւորգյանը:
Ռուզան ՄԻՆԱՍՅԱՆ
