«Տնտեսությունը հայրենասիրություն չի ճանաչում, եւ միայն հայրենասիրական մղումով գան այստեղ բիզնես դնեն արտերկրի հայերը, չի ստացվի: Բիզնեսն իր օրենքներն ունի»,-այսօր «Տնտեսություն եւ գործարարություն» ակումբում քննարկման ժամանակ նման կարծիք հայտնեց սփյուռքահայ ներդրող, «Միթեփ» ՍՊԸ հիմնադիր տնօրեն Միսակ Թեբելեկյանը, որը Հայաստանում շինարարության ոլորտում է բիզնես ծավալել:
Պարոն Թեբելեկյանը հորդորեց այլեւս չասել սփյուռքահայ, այլ օգտագործել արտերկրաբնակ հայ: Գործարարի դիտարկմամբ, որպեսզի արտերկրաբնակ հայերը գան Հայաստան ներդրումներ անելու, անհրաժեշտ է հարմար պայամններ ստեղծել, որպեսզի ներդրողներն իրենց զգան որպես իրենց տանը:
Պարոն Թեբելեկյանի խոսքերով` «Կապ չունի թե քանի միլիոն հայ ենք, պետք է բոլորս միասին այնպես անենք, որ այս փոքրիկ հողակտորը, որ մնացել է, կարողանանք այնպես զարգացնել, որ աշխարհում նշանակալի պետություններից մեկը լինի: Բոլորս պետք է մտածենք` Հայաստանը բոլորինս է: Եթե չլիներ ինձ տված այն գենետիկ հասկացությունը, որ ես հայ եմ, եւ այն, որ այս բոլորը պատկանում է ոչ միայն տեղաբնակներին, այլ բոլոր հայությանը, հավանաբար ես չէի ծավալի այն գործունեությունը, որը 10 տարի ծավալում եմ: Պետք է ստեղծել այնպիսի պայմաններ, որ արտերկրաբնակ հայերը ցանկանան իրենց ներուժը դնել այստեղ, որպեսզի Հայաստանը ծաղկի: Դրա լավագույն օրինակը Իսրայելն է, մի փոքր ուսումնասիրություն անենք, կտեսնենք, որ շատ բաներ ունենք անելու ու կարող ենք անել»:
Քննարկման մասնակից «Ժառանգություն» կուսակցության անդամ Հովսեփ Խուրշուդյանն էլ նկատեց, որ այսօր տնտեսություն ներդաշնակ չի զարգանում. որոշումները կայացնում են բիզնեսմենները. «Այսօր ՀՀ վերջին 2 նախագահները ամենախոշոր բիզնեսմեններն են մեր երկրի, եւ բնական է, բոլոր քաղաքական եւ պետական որոշումները կայացվում են իրենց եւ իրենց շրջապատի բիզնեսմեների շահերի համար»:
Կարդացեք նաև
Պարոն Խուրշուդյանի դիտարկմամբ` պետք է մտածել, թե ինչ կարելի է անել հաղթահարելու այն խնդիրը, որ կամ լուծելու այն խնդիրը, որ տնտեսության համար դարձել է չարիք, իսկ այդ չարինքն, ըստ պարոն Խուրշուդյանի, այն ձեռներեցներն են, որոնք սերտաճել են իշխանության հետ:
Պարոն Խուրշուդյանի դիտարկումները մանրամասն` տեսանյութում
«Ակցեռն» հոլդինգի նախագահ Հակոբ Բաղդասարյանի խոսքերով էլ, այսօր տնտեսություն բոլոր խնդիրները հանվում են ջրի երես, բայց լուծումներ գրեթե չեն առաջարկվում. «Խնդիրը տեսնում ենք, անցնում առաջ: Ամենախոցելի խավը գործարարն են, որովհետեւ այդ խավի վրա է հիմնված ամբողջ տնտեսությունը, բանակի հզորությունը, արվեստը, ամեն ինչ կառուցվում է դրա վրա: Եթե գործարարությունը խղճուկ վիճակում է, պետությունը չի կարող հզոր լինել»:
Պարոն Բաղդասարյանը նկատեց, որ ներկայումս Հայաստանում փոքր բիզնեսը չի կարողանում միջին դառնալ, միջինն էլ` մեծ. «Այս էվոլյուցիան խախտված է, տրանսֆորմացիան համարյա ոչնչացման եզրին է: Պետք է խաղի մրցակցային, հստակ կանոններ լինեն, անաչառ դատական համակարգ, ակտիվ հասարակություն, ժողովուրդ-կառավարություն կապը կարելի ապահովել հասարակական կառույցների միջոցով, ամբողջ խնդիրները վերլուծվեն, համակարգվեն եւ ներկայացվեն օրենսդրական մարմիններին»:
Պարոն Բաղդասարյանի ներկայացմամբ` ոլորտում եղած խնդիրների լուծման առաջնային պայմանը` թափանցիկության բարձրացումն է պետական մարմինների կառավարման համակարգում: Այսինքն, ըստ պարոն Բաղդասարյանի, թափանցիկություն, որ ունի գործատուն իր հաշվետվություններում, նույնը պետք է դրվի բյուջետային ծրագրերի իրականացման դեպքում, պատասխանատվության ինստիտուտում: Գործարարի դիտարկմամբ, պետք է խիստ պատասխանատվության ինստիտուտը ներդրվի.«Եթե լինի պատասխանատվության ինստիտուտը, ապա կառավարելն այդքան հաճելի չի լինի: Դա չկա, այդ պատճառով էլ հիմա բոլորն ուզում են դառնալ նախարար»:
Նելլի ԲԱԲԱՅԱՆ
