Գառնու տաճարի հարակից տարածքում սրճարան կառուցելու` ՀՀ մշակույթի նախարարության մտադրությունն այս պահին սառեցված հակամարտության է նման: Խնդիրն այն է, որ երբ շրջանառության մեջ դրվեց արգելոց-թանգարանի տարածքում սրճարան կառուցելու մտադրությունը, այն արժանացավ հասարակական լուրջ դիմադրության: Մտավորականներ, քաղաքական գործիչներ դեմ արտահայտվեցին այս նախագծին, որին հետևեց արգելոց-թանգարանի տարածքում` շինարարական աշխատանքների դադարեցումը:
«Պատմամշակութային արգելոց-թանգարանների և պատմական միջավայրի պահպանության» ծառայություն ՊՈԱԿ-ից օրեր առաջ Aravot.am-ին տեղեկացրին, թե սկսել են հանդիպումների շարք` շահագրգիռ կազմակերպությունների հետ:
Ամեն ինչ պարզ է ու հստակ. մասնագետները ընդդիմանում են այս նախագծի իրականացմանը, քանի որ վտանգ են տեսնում պատմամշակութային հուշարձանի պահպանության հարցում: Բայց մեկ հարց մնում է անպատասխան. ո՞րն է ՀՀ մշակույթի նախարարության շահագրգռվածությունը այդտեղ սրճարան կառուցելու հարցում:
Կարդացեք նաև
Aravot.am-ն այս հարցի շուրջ զրուցեց մի շարք մտավորականների հետ: Երեւանի Հովհաննես Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը մեր հարցին` մշակույթի նախարարության շահագրգռվածությունը` Գառնու տաճարի մերձակայքում սրճարան կառուցել, կասկածելի չէ՞: Պարոն Բաբայանը պատասխանեց. «Եթե ջրի երես դուրս գա, թե ով է կոնկրետ ուզում այդ սրճարանը կառուցել, ամեն ինչ պարզ կդառնա: Նախարարության շահագրգռվածությունը կարող է մեկը լինել` պահպանել մշակութային օջախը իր` հնարավորինս կուսական ձևով և ստեղծել պայմաններ, որ այն հնարավորինս շատ մարդ տեսնի: Հաստատ այդ նախագիծը չի հետապնդում մարդկանց հանգիստը կազմակերպելու նպատակ: Մենք գիտենք, թե այդպիսի գործերն ինչպես են արվում. նախ թեթև կառույց է կառուցվում, հետո մի քիչ ծանր, արդյունքում ստացվում է մեծ ռեստորանային համալիր: Սա այդ դեպքը չէ, քանի որ չորս կողմը գյուղեր են, և սնվելու վայրեր կան, և զուգարան: Ուստի կարելի է այդ փոքր տարածությունը հանգիստ անցնել առանց նման կառույցի»:
Ռուբեն Բաբայանը կարծում է, որ ժամանակն է հասարակության կարծիքի հետ հաշվի նստել:
Քանդակագործ Ֆերդինանտ Առաքելյանը մեր հարցին` արդյոք կասկածելի չէ՞ մշակույթի նախարարության շահագրգռվածությունը Գառնու տաճարի շրջակայքում սրճարան կառուցելու հարցում, այսպես պատասխանեց. «Հարցը խորապես չեմ ուսումնասիրել, բայց չեմ կարծում, որ Հասմիկ Պողոսյանը այդքան միամիտ է: Զրուցել եմ, նրանք պատճառաբանում են, թե այնտեղ մի փոքրիկ բան պետք է լինի: Բայց ժողովուրդը կասկածում է, որ կարող է շենք լինել: Ճիշտ է անում, որ կասկածում է: Ես այնտեղ շենք չեմ պատկերացնում, մյուս կողմից էլ՝ այսօր ամեն սրիկայություն սպասում եմ»:
Aravot.am-ի հարցին՝ Ձեզ դիմե՞լ են, քանի որ մշակույթի նախարարությունը հանդիպումների շարք է կազմակերպում Գառնու տաճարի շրջակայքում սրճարան կառուցել-չկառուցելու հարցով, քանդակագործն այսպես արձագանքեց. «Այս վերջերս այնքան զբաղված եմ լինում… մեկ հոգի է զանգել, ասել եմ, եթե գետնի տակ հնագիտական բան կա, մի մոտեցեք տարածքին»:
Տաթև ՀԱՐՈՒԹՅՈՒՆՅԱՆ
