Արժույթի միջազգային հիմնադրամի (ԱՄՀ) առաջ ամոթով չմնալու եւ ժամանակին մեր պարտավորությունները կատարելու համար, Ֆինանսների նախարար Դավիթ Սարգսյանը չորեքշաբթի կառավարության նիստում վարչապետ Տիգրան Սարգսյանից լրացուցիչ 660 միլիոն դրամ կխնդրի:
Այդքան գումար պակասում է Արժույթի միջազգային հիմնադրամի՝ Հայաստանին հատկացրած 202.4 միլիոն SDR վարկի մայր գումարի մարման համար: Վարկի մարումը մեր երկիրը պետք է սկսի այս տարվա առաջին եւ երկրորդ եռամսյակների ընթացքում՝ վճարելով 319 միլիոն SDR: Այս մասին տեղեկանում ենք կառավարության նիստի օրակարգից:
SDR-ն Արժույթի միջազգային հիմնադրամի փոխառության հատուկ իրավունքներն է եւ օգտագործվում է վճարային հաշվեկշիռներում՝ միջազգային անկանխիկ հաշվարկների նպատակով: Դրանք գնահատվում են ըստ դոլարից, եվրոյից, բրիտանական ֆունտից եւ ճապոնական յենից կազմված զամբյուղի:
Ֆինանսների նախարարի ներկայացմամբ, ԱՄՀ-ի պարտքը մարելու նպատակով այս տարվա բյուջեով նախատեսվել էր 19.8 միլիարդ դրամ, սակայն այդ գումարը չի բավականացնի, քանի որ ֆիննախի կատարած հաշվարկներից հետո արժութային շուկայում մեկ SDR-ի փոխարժեքը 620 դրամից դարձել է 638 դրամ, այսինքն՝ SDR-ի փոխարժեքը դոլարի նկատմամբ ունեցել է աճի միտում, ուստի անհրաժեշտություն է առաջացել լրացուցիչ գումարների:
Լուսինե ԲՈՒԴԱՂՅԱՆ
