Այսօր ԿԳ նախարար Արմեն Աշոտյանը մեկնաբանելով ՀՊՃՀ ռեկտոր Արա Ավետիսյանի հրաժարականը` հայտնել էր երկու բուհերի՝ ՀՊՃՀ-ի (Պոլիտեխնիկ) եւ Ճարտարապետության և շինարարության պետական համալսարանի հնարավոր միավորման մասին:
Նշենք, որ ՀՊՃՀ ռեկտորի լիազորություններն էլ դրվել են Ճարտարապետության եւ շինարարության ազգային համալսարանի ռեկտոր Հովհաննես Թոքմաջյանի վրա:
Այսօր Aravot.am-ի հետ զրույցում Արա Ավետիսյանը նշեց, որ հանգիստ խղճով է հեռանում պոլիտեխնիկից, քանի որ բուհը վստահվում է լավագույն մասնագետին ու վստահելի մարդուն: «Շնորհակալություն այս որոշման համար, ես հանգիստ եմ ընդունում այս փոխանցումը, քանի որ դա արվում է հանուն Պոլիտեխնիկի»,-ասաց արդեն նախկին ռեկտորը:
Նաեւ հավելեց, թե իր կարողությունները կարող է ի սպաս դնել հանուն տեխնիկական կրթության եւ գիտության զարգացման:
Կարդացեք նաև
Հետաքրքրվեցինք՝ ինչով է զբաղվելու պոլիտեխնիկի ռեկտորի պաշտոնը թողնելուց հետո: «Ոչ թե նոր ինչ-որ բան եմ անելու: Մեխանիկայի ինստիտուտում, որտեղ գլխավոր գիտաշխատող եմ, շարունակելու եմ իմ գիտական գործունեությունը եւ համապատասխան մասնագիտական դասընթացներ եմ կարդալու, եթե այդպիսի հրավեր ստանամ այն բուհերում, որտեղ իմ մասնագիտական կարողությունները օգտակար կհամարեն: Ես կարծում եմ, որ սա շատ կարեւոր փուլ է լինելու իմ կյանքում ստեղծագործ աշխատանքով զբաղվելու»,-պատասխանեց պարոն Ավետիսյանը:
Պատասխանելով բուհերի միավորման մասին նախարարի արած հայտարարության վերաբերյալ Aravot.am-ի հարցին՝ Հովհաննես Թոքմաջյանն էլ ասաց, որ բուհերի հնարավոր միավորումը չի նշանակում տարրալուծում, ուղղակի միասին կմտածեն առաջնահերթությունների լուծման ուղղությամբ: Պարոն Թոքմաջյանը հավելեց, որ որեւէ կարող ուժ առանց աշխատանք չի մնա, եւ որեւէ սովորող ուսանող ինչ-որ պատճառով չի տուժի: Բացի դրանից, մեր զրուցակցի ձեւակերպմամբ, «իմ ու քո չի լինելու»
Հետաքրքրվեցինք՝ մեծ ծանրաբեռնվածություն ունեցող աշխատանքի պատճառով հնարավո՞ր է հրաժարվի Երեւան քաղաքի ավագանու անդամությունից: Ստացանք բացասական պատասխան. Հովհաննես Թոքմաջյանը նախագիծ առաջարկներ ունի, որոնց իրականացման համար պատրաստ է օգտագործել բուհի լավագույն մասնագետների ներուժը:
Ի դեպ, 1984-ին Հովհաննես Թոքմաջյանին հեռացրել են պոլիտեխնիկից՝ քննական շրջանում Թբիլիսիում թեկնածուական ատենախոսություն պաշտպանելու համար, եւ այժմ նա նույն աշխատասենյակ վերադառնում է իբրեւ ռեկտոր:
Մանրամասները՝ վաղվա տպագիր «Առավոտում»:
Գոհար ՀԱԿՈԲՅԱՆ
