«Այն վճռականությունը, որը ՌԴ-ն ցուցաբերում է իրադարձություններում, խոսում է այն մասին, որ դա արկածախնդրություն չէ»,-այսօր «Հայելի» ակումբում լրագրողների հետ հանդիպմանը հայտարարեց քաղաքագետ Ալեքսանդր Մանասյանը՝ անդրադառնալով Ղրիմի շուրջ տեղի ունեցած զարգացումներին: Ղրիմյան ճգնաժամը քաղաքագետը միայն Ղրիմինը չհամարեց և շեշտեց, որ այն ունի աշխարհաքաղաքական նշանակություն:
Հարցին՝ այս զարգացումներն ի՞նչ ազդեցություն կունենան ԼՂ հակամարտության լուծման գործընթացի վրա, պարոն Մանասյանն այսպես արձագանքեց. «Արցախի հարցը չպետք է կապել Ղրիմի հարցի հետ: Մենք բոլորովին չպետք է մտածենք, թե դեպքերի այս կամ այն ընթացքը միանշանակ կպայմանավորի Ղարաբաղյան հակամարտության այս կամ այն լուծումը: Ոչ միայն այն պատճառով, որ ամեն անգամ մենք հանդիպում ենք փաստի, որ ամեն հակամարտություն կարգավորվում է յուրովի, այլ խնդիրն այն է, որ ամեն մի պարագայում ամեն մի իրադրություն անկրկնելի է գլոբալ իմաստով և գլխավոր խաղացողները տարբեր մոտեցումներ են ցուցաբերում կոնկրետ հակամարտության նկատմամբ: Եթե հույս ենք տածում, թե ահա Ղրիմը անկախացավ, անցավ ՌԴ-ին, այդպես դրա հարցը լուծվեց: Մենք այդպիսով մեզ զինաթափում ենք: Մեզ թվում է, թե ուրիշներին ենք հանձնում մեր խնդիրը: Այնինչ մենք պետք է պատրաստ լինենք դեպքերի այլ ընթացքին»:
Քաղաքագետը ուկրաինական զարգացումները համարում է կառավարվող՝ աշխարհի տարբեր կենտրոններից. «Վեր հառնող Ռուսաստանը, անկում ապրող Ռուսաստանը վերագտել է իրեն»:
Aravot.am-ի հարցին՝ արդյոք Մինսկի խմբի համանախագահների գաղափարական հակասությունները կազդե՞ն Ղարաբաղյան հակամարտության կարգավորման գործընթացին, պարոն Մանասյանը պատասխանեց. «Մինսկի խմբի համանախագահները կընդունեն մի այնպիսի կեցվածք, թե իբրև ոչինչ չի եղել»:
Կարդացեք նաև
Aravot.am-ը, հիշեցնելով Անդրիաս Ղուկայանի այն մտահոգությունը, թե հնարավոր է մարտի 22-ին սկսվի Երրորդ հայրենականը, պարոն Մանասյանը պատասխանեց. «Բոլոր խոշոր երկրների ղեկավարները պետք է խելագար լինեն դեպքերը նման հունով զարգացնելու համար: Իրար զսպող և հավասարակշռող ուժեր կան աշխարհում, եթե կա Չինաստան, Ռուսաստան, Եվրոպա, ապա այդ նժարները գրեթե այսօր գտնվում են հավասարակշռված տատանումների մեջ»:
Պարոն Մանասյանը նաև նշեց, թե Ռուսաստանում ժողովրդագրական խոր ճգնաժամ է կանխատեսում:
Տաթև ՀԱՐՈՒԹՅՈՒՆՅԱՆ
