Տավուշի սահմանագոտում գյուղացիները վտանգի տակ են մշակում հողերը

Բերդի տարածաշրջանի Այգեպար համայնքի ղեկավար Անդրանիկ Այդինյանը հայտնեց, որ այգեպարցիները տագնապով են սկսում գարնանային աշխատանքների մեկնարկին, մտավախություն կա, որ ադրբեջանական զինուժը  կրակ կբացի դաշտերում աշխատող  գյուղացիների վրա: Նա ասաց, որ  ադրբեջանական գնդակոծության, վտանգների պատճառով  սակավահող Այգեպարում չի մշակվում 35 հա տարածք:

Ներքին Կարմիր Աղբյուր համայնքը հայ-ադրբեջանական հակամարտության տարիներին ադրբեջանական զինուժի կողմից առավել հրետակոծված  համայնքներից է:  Գյուղապետ  Մանվել Կամենդատյանն ասաց, որ ադրբեջանական վտանգի պատճառով  հողերի 80 տոկոսը չի մշակվում, 730 հա վարելահողերից վարուցանք է կատարվել  120 հեկտարում:  Համայնքում կա  33 հա խաղողի այգի: Սահմանամերձ, վտանգավոր լինելու պատճառով 2 տարի առաջ գյուղացիները հրաժարվել են  5 հա խաղողի այգու  մշակությունից: Ներքին  Կարմիր  Աղբյուրի գյուղապետի վկայությամբ՝ ադրբեջանական զինուժը  հայկական գյուղերը գնդակոծելիս օգտագործում է խոշոր տրամաչափի գնդացիրներ: Մ. Կամենդատյանի խոսքերով՝ գյուղացիները գնդակոծությունից վախենալով   հանդերձ՝ ապրում են իրենց  սովորական առօրյայով:

Սահմանակից Չինարի համայնքի ղեկավար  Սամվել Սաղոյանն ասաց, որ գյուղում մեկնարկել են գարնան գյուղատնտեսական   աշխատանքները, գյուղացիները մշակում են հողերը, էտում խաղողի այգիների վազերը:  Ադրբեջանին սահմանամերձ, վտանգավոր լինելու պատճառով  չի մշակվում գյուղի հողերի շուրջ 70 տոկոսը, պահուստային հողերի հետ միասին՝ 400-500 հա:  Ադրբեջանի հետ սահմանամերձ Մովսես համայնքի  ղեկավար Արարատ Ավալյանը հայտնեց, որ գարնան  գյուղատնտեսական աշխատանքերը սկսվել  են, մովսեսցիները, վտանգն անտեսելով, մշակում են իրենց հողերը: Սահմանամերձ գոտում  գտնվելու պատճառով չի մշակվում Մովսեսի  հողատարածքների 15 տոկոսը:

Ոսկան ՍԱՐԳՍՅԱՆ