«ՏՄՊՊՀ-ն մոլորեցնում է սպառողներին»,-մարտի 15-ին էլեկտրատեխնիկայի վաճառքով զբաղվող ընկերությունը նման վերնագրով հայտարարություն է տարածել ֆեյբուքյան իր էջում:
Մարտի 14-ին տնտեսական մրցակցության պաշտպանության պետական հանձնաժողովն իր նիստում որոշեց 15 միլիոն դրամով տուգանել «Վեստան» ներկայացնող «Փրիթի Ուեյ» ՍՊԸ-ին :
Հանձնաժողովի հիմնավորմամբ` «Վեստան» գովազդներում ներկայանում է, որպես համաշխարհային մի շարք հանրաճանաչ բրենդների` «Սամսունգ», «Ֆիլիպս», «Պանասոնիկ» եւ այլ բրենդների պաշտոնական ներկայացուցիչը, մինչդեռ հանձնաժողովի ուսումնասիրությամբ «Վեստան» դրանց պաշտոնական ներկայացուցիչը չէ եւ սերտիֆիկատները, որ ներկայացրել է ընկերությունը, գործընկերների միջեւ առկա որոշակի առեւտրային հարաբերությունները վկայող փաստաթուղթ է: Հանձնաժողովը գտել է, որ ընկերությունը մոլորեցնում է սպառողներին:
«Փրիթի Ուեյը» գտնում է, որ հանձնաժողովն անհիմն է տուգանել. «Պարոն Շաբոյանն իր ելույթում նշեց, թե իբր «Վեստա»-ն ներկայացրել է հաճախորդներին, որ հանդիսանում է 15-ից ավելի աշխարհում հայտնի ապրանքային նշանների պաշտոնական և միակ ներկայացուցիչը Հայաստանի Հանրապետությունում: Նախ՝ հարկ է նշել, որ «Վեստա»-ն երբեք չի՛ ներկայացրել եւ չի՛ գովազդել այն մասին, որ հանդիսանում է որեւէ ապրանքային նշանի միակ ներկայացուցիչը ՀՀ-ում: Այս առումով, հարգարժան պարոն Շաբոյանի փաստարկը ոչ այլ ինչ է, քան հերյուրանք եւ վարկաբեկման ակնհայտ փորձ: Հարգելի՛ Շաբոյան, ինչու՞ եք հերյուրում եւ մոլորության մեջ գցում սպառողներին անհիմն հայտարարություններով:
Կարդացեք նաև
Երկրորդ՝ ՀՀ ՏՄՊՊՀ–ին ներկայացվել են կենցաղային տեխնիկայի արտադրությամբ և վաճառքով զբաղվող համաշխարհային ճանաչում վայելող ընկերությունների կողմից «Փրիթի ուեյ» ՍՊԸ-ին շնորհված հավաստագրեր, որոնք վկայում են այն մասին, որ «Փրիթի ուեյը» այդ ապրանքանիշերի արտադրանքը ներկրելու, ներկայացնելու, վաճառելու, գովազդելու, երաշխիքային եւ հետերաշխիքային սպասարկում իրականացնելու իրավունք ունի: Ի՞նչ մոլորության մասին է խոսքը, երբ ընկերությունը ներկայացնում է աշխարհում հայտնի ապրանքանիշերի գործարանային պաշտոնական արտադրանքը»:
Ապա ընկերությունը ներկայացնում է այն փաստաթղթերը, որոնք տրվել են ՏՄՊՊՀ-ին, եւ հիմնավորում են, որ հանձնաժողովը սխալ որոշում է կայացրել:
«ՀՀ ՏՄՊՊՀ-ն կատարում է ինչ-որ մեկի պատվերը, բառախաղ է խաղում, հերյուրում է եւ միտումնավոր մոլորեցնում հայ սպառողին՝ ցանկանալով վնաս հասցնել տարիներով վաստակած մեր բարի համբավին»,-ասված է «Վեստայի» հայտարարության մեջ:
Aravot.am-ը փորձեց ընկերությունից պարզել, արդյոք բավարարվելու են միայն ֆեյսբուքյան հայտարարությա՞մբ, թե կդիմեն դատարան` վիճարկելու ՏՄՊՊՀ-ի որոշումը: «Վեստայից» մեզ վստահեցրին, որ առայժմ հանձնաժողովից պաշտոնական որոշումը գրավոր չեն ստացել. «Երբ կստանանք իրենց գրավոր փաստաթուղթը` տուգանման որոշման մասին, այդ ժամանակ էլ մեր հետագա քայլերը կորոշենք, թե ինչ եւ ինչպես պետք է անենք»:
Նելլի ԲԱԲԱՅԱՆ
