Ամբողջ տարվա ընթացքում մարդու օրգանիզմը հավաքում է մոտ 8 կիլոգրամ թույն, եւ եթե այն չեն մաքրում, վնասում եւ թուլացնում է օրգանիզմը»,-այսօր «Երկու երես» մամուլի ակումբում ասաց բժիշկ, արեւելյան բժշկության մասնագետ` Հասմիկ Խաչատրյանը:
Բժշկի վստահեցմամբ` գարունը լավագույն շրջանն է օրգանիզմը թույներից մաքրելու համար: Ըստ մասնագետի, պատահական չէ, որ բոլոր կրոններում Մեծ Պահքի շրջանը համընկնում է գարնան սկզբին:
Օրգանիզմի մաքրումը, մասնագետի ներկայացմամբ` անհրաժեշտ է սկսել լյարդից, քանի որ, եթե լյարդում կան խնդիրներ, նախ պետք է այդ օրգանը մաքրել, ամրացնել, որպեսզի ամբողջ տարի կարողանա բնականոն աշխատել. «Օրգանիզմում հավաքված ոչ պիտանի նյութերը հիմնականում չեզոքացնում է լյարդը` դարձնելով անվտանգ նյութեր, որոնք երիկամների միջոցով օրգանիզմից դուրս են գալիս»:
Տիկին Խաչատրյանի խոսքերով` արեւելյան բժշկության սկզբունքներով տարվա ամեն եղանակ ունի իր համապատասխան օրգանը, որը տվյալ սեզոնին դառնում է ավելի խոցելի. ձմռանը համընկնում է երիկամների եւ միզապարկերի հետ, գարնանը` լյարդի, ամռանը` սրտի, աշնանը ստամոքսի եւ ուշ աշնանը՝ թոքերի հետ:
Կարդացեք նաև
«Տարվա յուրաքանչյուր եղանակին, եթե համապատասխան օրգանները մաքրվեն ու վերականգնվեն, մարդը առողջ կլինի»,-ասաց բժիշկը, հավելելով` «Ամռանը պետք է ուտել միրգ, բանջարեղեն, ընդունել մեծ քանակի հեղուկներ, իսկ ձմռանը պետք է ընդունել հատիկաընդեղեն, առանց այն էլ մեր ընդունած սնունդը հիմնականում անորակ է, արհեստական, ուստի ինչքան հնարավոր է պետք է խուսափել անառողջ սննդից»:
Բժշկի վստահեցմամբ` օրգանիզմը մաքրելու համար պետք է խուսափել ժամը 19.00-ից հետո ուտել ծանրամարս սնունդ, յուղոտ կերակուրներ, պետք է ընդունել մեծ քանակի ջուր կամ կանաչ թեյեր, եւ անպայման ուշադրություն դարձնել քնի որակին:
Տիկին Խաչատրյանի խոսքերով` լյարդը համարվում է մտածող օրգան, նրա հանգստին պետք է մեծ ուշադրություն դարձնել. «Եթե գիշերը լեղապարկը հանգստանում է 23:00-1:00 ժամերին, ապա լյարդը` 1:00ից մինչեւ 3:00-ն: Լյարդը բիոքիմիական լաբորատորիա է, որը արտադրում է 2000-ից ավելի ֆերմենտներ եւ նյութեր, որոնք օրգանիզմի բոլոր պրոցեսներին մասնակցելու համար անհրաժեշտ են»:
Լյարդային խնդիրները, ըստ բժշկի, հաճախ հանգեցնում է մաշկային, անոթային, հորմոնային խնդիրների եւ ալերգիկ երեւույթների: Ալերգիա ունեցող մարդկանց տիկին Խաչատրյանը խորհուրդ տվեց մինչեւ ծառերի ծաղկելը մաքրել լյարդը : Մաքրող, վերականգնող լավ միջոցներ են, ըստ տիկին Խաչատրյանի, թարմ կաթը, որի մեջ եռալու ընթացքում պետք է կիտրոն ճզմել, ապա ստացված կաթնաշոռը օրվա ընթացքում ուտել, բայց դրանից 1 ժամ առաջ եւ հետո կոֆեին չօգտագործել:
«Մարդու օրգանիզմում կան նաեւ պարազիտներ, որոնք եթե չմաքրվեն օրգանիզմից, արտադրում են թույներ` նյարդային, ալերգիզացիա անող, ուստի շատ անհրաժեշտ է օրգանիզմը մաքրել նաեւ պարազիտներից. առավոտյան ընդունել դդումի 35 կորիզ կամ մեխակի 15 հատիկները 1 բաժակ եռացրած ջրի մեջ գցել, գիշերը թրմել, առավոտյան սոված փորին կում-կում խմել` 3 օրը մեկ»:
Անուշ ՄԱԹԵՎՈՍՅԱՆ
