«Ռուսները մի արտահայտություն ունեն, ասում են՝ «тише воды, ниже травы». Հիմա Ադրբեջանն այդ վիճակում պետք է լինի, որ փորձի խուսափել իր համար նախատեսված հնարավոր փորձանքներից»,- այսօր «Ուրբաթ» ակումբում հայտարարեց «Ղարաբաղ» կոմիտեի անդամ Աշոտ Մանուչարյանը՝ անդրադառնալով Լեռնային Ղարաբաղի խնդիրն ու ուկրաինական իրադարձություններն իրար կապելուն:
Աշոտ Մանուչարյանի համոզմամբ՝ Ռուսաստանը մտել է պատերազմի մեջ, իսկ մարտունակ լինելու համար, նա նախ եւ առաջ պետք է ամբողջականացնի իր ազդեցության տարածքները, ու նրա համար հերթական թիրախն Ադրբեջանն է, որի կարգավիճակը պետք է փոխվի։
Աշոտ Մանուչարյանը գտնում է, որ Ռուսաստանը ԱՄՆ-ից սովորել ու ընդօրինակել է կատարվածը, ուստի՝ Ուկրաինան ինքն է մեղավոր, քանի որ թույլ տվեց իրեն վերածել աշխարհաքաղաքական բախումների թատերաբեմի. «ԱՄՆ-ը Ռուսաստանին, այսինքն՝ արջին որջից հանել է, իսկ որջ վերադարձնելն արդեն անհնար է»,- վստահեցրեց նա:
Աշոտ Մանուչարյանը կարեւորեց նաեւ Թուրքիայի դերը, ասելով, թե այն պետք է տրոհվի:
Աշոտ Մանուչարյանը գտնում է՝ «Հայաստանը Նախիջեւանի հարցով պետք է բանակցի Ռուսաստանի ու Իրանի հետ»,- ասաց նա հավելելով, որ այս մասին շատ է խոսվում, բայց չի բարձրաձայնվում:
Կարդացեք նաև
Անդրադառնալով Ղրիմի հանրաքվեից հետո ստեղծված իրավիճակին՝ Աշոտ Մանուչարյանն ասաց, որ կատարվածը մեծ փոփոխությունների սկիզբ է, սակայն՝ «Ոտքի ելած ժողովուրդը չպետք է երբեք թույլ տար իրեն օգտագործեին: Ուկրաինայի ժողովուրդն ուզում էր ապրել առանց օլիգարխների, նորմալ կյանքով, բացի այդ, ուզում էր զարգացնել հարաբերությունները Եվրոպայի հետ՝ պահպանելով Ռուսաստանի հետ ունեցած իր հարաբերությունները: Նրանց համար հարցը հստակ էր, բայց Մայդանը վերածվեց Եվրամայդանի եւ ժողովուրդը թույլ տվեց օգտագործել իրեն»:
Եվա ՀԱԿՈԲՅԱՆ
