Մարտի 15-16-ին Եվրասիա միջազգային համալսարանի «Եվրասիա» բանավեճի ակումբը` Բաց հասարակության հիմնադրամներ-Հայաստանի օժանդակությամբ, «Երիտասարդները բանավեճում» ծրագրի շրջանակներում նախաձեռնել էր բանավեճի մրցաշար: Մրցաշարին հայտ էին ներկայացրել ՀՀ տարբեր բուհերի բանավիճող թիմեր և բուհերից ու կազմակերպություններից կամովին համալրված առանձին (մրցաշարին հայտագրվել էին 18 թիմ): Բանավեճն ընթացավ երեք փուլով. նախընտրական, կիսաեզրափակիչ և եզրափակիչ: Նախընտրական փուլ դուրս եկավ 8 թիմ:
Նախընտրական փուլում թիմերը բանավիճեցին «Միգրացիայի հիմնական պատճառը քաղաքական կոնֆլիկտներն են» թեմայի շուրջ: Բերվեցին բազմաթիվ փաստարկներ. կոնֆլիկտները, բնակչության սպառողական զամբյուղի անհամապատասխանությունը, աշխատատեղերի պակասը և հատկապես նյութական արտադրության ցածր մակարդակը ու ոչ համալիր զարգացումը, երկրի սոցիալտնտեսական զարգացման աճի ցածր տեմպերը, վաղվա օրվա նկատմամբ բնակչության անվստահությունը և համեմատաբար ապահով ապրելավայր ընտրելու ցանկությունը, ուսանողների շարժունության նկատմամբ ակտիվացումը և այլն:
Միավորների ամփոփման արդյունքում 4 թիմ անցան կիսաեզրափակիչ: Նրանք բանավիճեցին «Հայաստանը պետք է վարի Եվրոպական ինտեգրմանն ուղղված քաղաքականություն» ընդգրկուն թեմայի շրջանակներում: Բանավիճողները ընդգծեցին, որ Եվրաինտեգրման հնարավորության դեպքում ՀՀ-ում արագընթաց տեմպերով կխորանային արդեն սկսված նախաձեռնությունները, հատկապես ժողովրդավարական ինստիտուտների կայացման առումով, կակտիվանար առևտրային համագործակցությունը Եվրոպական երկրների հետ, կընդլայնվեր հանրապետությունում արտադրված ապրանքների իրացման շուկան (եթե արտադրական գործունեությունը բավարարեր եվրոչափանիշներին): Այս դրական միտումների հետ մեկտեղ մեր հանրապետությունում կտարածվեր եվրոմշակույթ, որը ունի նաև որոշ բացասական դրսևորումներ: Բանավիճողների կարծիքով հանրապետության հեռանկարային զարգացման սցենարի հիմքում պետք է դնել ազգային ավանդույթների պահպանումը և հատկապես նոր մշակույթային արժեքների զգուշորեն տեղայնացումը: Բացի այդ, եվրաինտեգրումը անհնարին է դեպի Եվրոպա տանող ուղիղ ճանապարհների բացակայության պատճառով:
Եզրափակիչ փուլում քննարկման առարկա դարձավ «Հայաստանի անդամակցումը Մաքսային միությանը սահմանափակում է ՀՀ ինքնիշխանությունը» թեման: Այս փուլում առաջարկված թեման քննարկելու իրավունք ստացան եզրափակիչ փուլ դուրս եկած Երևանի Ճարտարապետաշինարարական համալսարանի և ԵՊՀ ուսանողներից կազմված «Նիկե» միացյալ թիմը, որպես «Կողմ», և «Վորլդ Վիժն» միջազգային բարեգործական կազմակերպության Գյումրիի տարածքային զարգացման կենտրոնի «ART-իստներ» թիմը, որպես «Դեմ»: Հատկանշական էր կողմ թիմի դիրքորոշումը. Մաքսային միությանը անդամակցելը սահմանափակում է ՀՀ ինքնիշխանությունը և հակասում է մեր սահմանադրության 1-ին հոդվածին: Դրական հետևանքներից թվարկվեց տնտեսական և ռազմական շահեկան համագործակցությունը, ՌԴ-ում բնակվող մեր հայրենակիցների իրավական վիճակի բարելավումը (չնայած միգրացիայի առումով արդեն անցանկալի սահմանափակումներ են առաջացել), ավանդական տնտեսական կապերի վերականգնման միտումները և այլն: Բանավեճի մրցաշարն ավարտվեց «Նիկե» թիմի հաղթանակով, տեղի ունեցավ մրցանակաբաշխություն և մասնակիցներին տրվեցին հավաստագրեր: Մասնակիցներն ու կազմակերպիչները շնորհակալություն հայտնեցին Բաց հասարակության հիմնադրամներ-Հայաստանի ՀԿ-ին այս նախաձեռնության համար:
Եվրասիա միջազգային համալսարանի «Եվրասիա» բանավեճի ակումբ
